ខេត្តសៀមរាប៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ថា មានប្រសាសន៍ថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការងារបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ ដែលបានបញ្ចប់នាពេលកន្លងមក គឺជាសមិទ្ឋផលថ្មីមួយទៀតដែលបានឆ្លុះបញ្ចាំងឲ្យឃើញច្បាស់អំពីជំហានទៅមុខដ៏រឹងមាំ គ្មានអ្វីអាចមកបន្ទុចបង្អាក់ដំណើរការលទ្ឋិប្រជាធិបតេយ្យ សេរី ពហុបក្ស និងនីតិរដ្ឋនៅកម្ពុជានោះទេ។
មានប្រសាសន៍បែបនេះ អំឡុងពេលដែល ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត អញ្ជើញជាអធិបតីភាពដ៏ខ្ពង់ខ្ពស់ ជាមួយនិង ឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត ក្នុងពិធីបិទសន្និបាតថ្នាក់ជាតិបូកសរុបការងារបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ និងការងារបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤ របស់ គ.ជ.ប នៅរសៀលថ្ងៃទី ២៤ ខែមិថុនា ឆ្នាំ២០២៤ ដោយមានការអញ្ជើញ ចូលរួមដោយ ឯកឧត្តម លី សំរិទ្ធ ប្រធានក្រុមប្រឹក្សាខេត្ត ឯកត្តម ប្រាក់ សោភ័ណ អភិបាល នៃគណៈអភិបាលខេត្ត ព្រមទាំងឯកឧត្តម លោកជំទាវជាអនុប្រធាន សមាជិកគ.ជ.ប តំណាងព្រះបរម្យរាជវ៉ាំង អគ្គស្នងការរង ក្រុមប្រឹក្សាខេត្ត អភិបាលខេត្ត និងវត្តមានសមាជិក សមាជិកាគណៈកម្មាធិការរៀបចំការបោះឆ្នោត មកពីបណ្តាខេត្ត-រាជធានីទាំង ២៥ និង លោក លោកស្រី តំណាងក្រសួង ស្ថាប័ន គណបក្សនយោបាយ សមាគម និង អង្គការមិនមែនរដ្ឋាភិបាល សរុបចំនួនប្រមាណ ជាង ៥០០នាក់។
ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានធ្វើការវាយតម្លៃខ្ពស់ចំពោះថ្នាក់ដឹកនាំនិងមន្ត្រី គ.ជ.ប គ្រប់លំដាប់ថ្នាក់ អាជ្ញាធរ កងកម្លាំងប្រដាប់អាវុធ គណបក្សនយោបាយ សមាគម អង្គការនានាព្រមទាំងអ្នកបោះឆ្នោតទាំងអស់ដែលបានអនុវត្តតាមតួនាទីនិងគោរពយ៉ាងខ្ជាប់ខ្ជួនតាមច្បាប់ស្តីពីការបោះឆ្នោត បទបញ្ជា និងនីតិវិធីក្រមសីលធម៌សម្រាប់ការបោះឆ្នោតគ្រប់ដំណាក់កាល និងផ្តល់កិច្ចសហការគាំទ្រគ្នាទៅវិញទៅមកធ្វើឱ្យការបោះឆ្នោតទាំងពីរនេះបានប្រព្រឹត្តិទៅរលូន សេរី ត្រឹមត្រូវ យុត្តិធម៌ តម្លាភាព គ្មានអំពើហិង្សានិងមានសុវត្ថិភាពយ៉ាងល្អប្រសើរ ហើយលទ្ឋផលនៃការបោះឆ្នោតនេះក៏ត្រូវបានគណបក្សនយោបាយនានាដែលចូលរួមប្រកួតប្រជែងទទួលស្គាល់ផងដែរ។
ឯកឧត្តមអភិសន្តិបណ្ឌិត បានបន្តថា ការបោះឆ្នោតដ៏មានសារៈសំខាន់ទាំងពីរនេះបានជះឥទ្ឋិពលមកលើប្រព័ន្ឋនយោបាយ និងការគ្រប់គ្រងរដ្ឋបាលសាធារណៈនៅកម្ពុជា ដូចជា ៖ ការពង្រឹងពង្រីកលទ្ឋិប្រជាធិបតេយ្យសេរីពហុបក្ស និងនីតិរដ្ឋលើមូលដ្ឋាននៃស្មារតីបង្រួបបង្រួមជាតិនិងសុខដុមរមណីយកម្មជាតិទាំងមូល ក្រោមដំបូលសន្តិភាពនិងការអភិវឌ្ឍ។
ឯកឧត្តមអភិសន្តិបណ្ឌិត មានប្រសាសន៍បញ្ជាក់ថា ការបន្តអនុវត្តកំណែទម្រង់អភិបាលកិច្ចនៅថ្នាក់ក្រោមជាតិដែលត្រូវគ្រប់គ្រងតាមគោលការណ៍នៃរដ្ឋបាលឯកភាព ដើម្បីបង្កើត ជំរុញនិងធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដែលកត្តានេះនឹងនាំមកនូវទី១- ចូលរួមក្នុងការពង្រឹងពង្រីកដំណើរការលទ្ឋិប្រជាធិបតេយ្យ សេរីពហុបក្សឱ្យចាក់គ្រឺះរឹងមាំរហូតដល់ថ្នាក់មូលដ្ឋាន ទី២- នាំមកនូវការផ្លាស់ប្តូររចនាសម្ព័ន្ឋនិងប្រព័ន្ឋគ្រប់គ្រងរដ្ឋបាលសាធារណៈនៅកម្ពុជា តាមបែបផែនវិមជ្ឈការនិងវិសហមជ្ឈការ និងទី៣-លើកកម្ពស់ការចូលរួមនិងភាពជាម្ចាស់របស់ប្រជាពលរដ្ឋគ្រប់មូលដ្ឋានក្នុងការអភិវឌ្ឍមូលដ្ឋានរបស់ខ្លួន សំដៅចូលរួមកាត់បន្ថយភាពក្រីក្រនិងលើកកម្ពស់គុណភាពនៃជីវិតរបស់ប្រជាពលរដ្ឋក្នុងសហគមន៍នានាក្នុងមូលដ្ឋាន ។ ទន្ទឹមនឹងនេះក្រសួងមហាផ្ទៃក៏កំពុងរៀបចំវគ្គបណ្តុះបណ្តាលតម្រង់ទិសដល់សមាជិកក្រុមប្រឹក្សាដែលទើបជាប់ឆ្នោតថ្មីដើម្បីឲ្យសមាជិកក្រុមប្រឹក្សាដែលមកពីគណបក្សនយោបាយផ្សេងគ្នា សហការរួមគ្នានៅក្នុងក្រុមប្រឹក្សារបស់ខ្លួន បន្តជម្រុញកំណែទម្រង់អភិបាលកិច្ចតាមបែបប្រជាធិបតេយ្យនិងវិមជ្ឈការនៅមូលដ្ឋាន សំដៅលើកកម្ពស់ការផ្តល់សេវានិងការអភិវឌ្ឍមូលដ្ឋានប្រកបដោយប្រសិទ្ឋភាពខ្ពស់ ។
ជាមួយគ្នាផងដែរ ឯកឧត្តម ប្រាជ្ញ ចន្ទ ប្រធាន គ.ជ.បបញ្ជាក់ថា ឆ្លងកាត់រយៈពេលមួយថ្ងៃ អង្គសន្និបាតបានប្រមូលផ្តុំនិងពិភាក្សាលើប្រធានបទសំខាន់ៗសម្រាប់ការបោះឆ្នោត រួមមាន១- ការចុះឈ្មោះបោះឆ្នោត និងការរៀបចំបញ្ជីបោះឆ្នោត។ ២-ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ៣-ការគ្រប់គ្រងប្រព័ន្ឋផ្សព្វផ្សាយក្នុងដំណើរការបោះឆ្នោតនិងការឃោសនាបោះឆ្នោត ៤-កិច្ចសហការបោះឆ្នោត រាប់សន្លឹកឆ្នោត ត្រួតពិនិត្យ ផ្ទៀងផ្ទាត់និងបូកសរុបលទ្ឋផលនៃការបោះឆ្នោត និងទី៥នីតិវិធីនៃការដាក់ ការទទួលនិងការដោះស្រាយពាក្យបណ្តឹងក្នុងដំណើរការបោះឆ្នោត។ ទន្ទឹមនឹងនេះ អង្គសន្និបាតបានរកឃើញចំណុចខ្លាំងដែលជាបទពិសោធសម្រាប់អនុវត្តបន្តជាច្រើនចំណុច ជាមួយគ្នានេះអង្គសន្និបាតក៏បានរកឃើញនូវចំណុចខ្វះខាតមួយចំនួនក្នុងដំណើរការបោះឆ្នោត ផងដែរ។
សូមជម្រាបជូនផងដែរថា អង្គសន្និបាតនេះ រៀបចំឡើងក្នុងគោលបំណងពិគ្រោះនិងផ្លាស់ប្តូរយោបល់អំពីចំណុចខ្លាំង ចំណុចខ្សោយ កាលានុវត្តភាពនិងបញ្ហាប្រឈមនានា ដែលកើតមានឡើងក្នុងដំណើររៀបចំការបោះឆ្នោតអសកលទាំងពីរសម្រាប់ជាមូលដ្ឋានសម្រាប់ជាមូលដ្ឋានកែលំអការបោះឆ្នោតនាពេលខាងមុខឲ្យកាន់តែល្អប្រសើរថែមទៀត៕KD