រាជធានីភ្នំពេញ៖ នៅព្រឹកថ្ងៃទី៣០ ខែសីហា ឆ្នាំ២០២៥នេះ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានចេញមកបំភ្លឺ ក្រោយមានការផ្សព្វផ្សាយចោទលោកអធិការរងម្នាក់ នៃអធិការដ្ឋាននគរបាលខណ្ឌចំការមន ថាបានស្រែកសម្លុត ប្រើពាក្យសំដីនិងកាយវិកាមិនសមរម្យចំពោះស្រ្តី០២នាក់នៅចំណុចកោះពេជ្រខណ្ឌចំការមនកាលពីយប់អធ្រាត្រថ្ងៃទី២៩ ខែសីហា ឆ្នាំ២០២៥។ 
ស្នងការដ្ឋាននគរបាលរាជធានីភ្នំពេញថា នៅថ្ងៃទី២៩ ខែសីហាឆ្នាំ២០២៥ វេលាម៉ោង២៣ និង៤០នាទី ត្រង់ចំណុចសួនច្បារមុខសាលាកោះពេជ្រ វិថីសួនច្បារ ក្រុមទី៧៨ ភូមិ១៤ សង្កាត់ទន្លេបាសក់ ខណ្ឌចំការមន រាជធានីភ្នំពេញ មានករណីអំពើឃាតកម្ម មួយកើតឡើងដោយស្រ្តីម្នាក់ត្រូវបានជនមិនស្គាល់អត្តសញ្ញាណប្រើប្រាស់កូនកាំបិតចាក់ និងអាករ សម្លាប់ទៅលើជនរងគ្រោះ មិនទាន់ដឹងមូលហេតុ ហើយឃាតករបានគេចខ្លួនបាត់។
ស្នងការដ្ឋាននគរបាលរាជធានីភ្នំពេញបានបន្តថា បន្ទាប់ពីទទួលបានព័ត៌មានខាងលើ កម្លាំងសមត្ថកិច្ច បានចុះទៅកន្លែងកើតហេតុ ពេលនោះលោកវរសេនីយ៍ត្រី ហួត គង់ ដែលមានឋានៈជាអធិការរងខណ្ឌចំការមន ទទួលបន្ទុកផ្នែកពិនិត្យវិភាគកន្លែងកើតហេតុ នៃអធិការដ្ឋាននគរបាលខណ្ឌចំការមន បានចុះទៅដល់កន្លែងកើតហេតុ ក៏ប្រទះឃើញអ្នកសារព័ត៌មានជាច្រើនអង្គភាពកំពុងសម្ភាសន៍ជាមួយស្រ្តី០២ នាក់ មានឈ្មោះ សៀម ចាន់សន និងឈ្មោះ ឃន់ ស្រីកា នៅកន្លែងកើតហេតុ ពេលនោះលោកវរសេនីយ៍ត្រី ហួត គង់ បានស្នើសុំ ពួកគាត់សហការទៅធ្វើសាក្សីបំភ្លឺពីព្រោះគាត់អាចជាសាក្សីសំខាន់ផងដែរ នៅប៉ុស្តិ៍នគរបាលរដ្ឋបាលទន្លេបាសាក់ ជុំវិញរឿងហេតុខាងលើ តែដោយស្ត្រីទាំង០២នាក់ បានប្រកែកនឹងអង្គុយលើម៉ូតូបម្រុងចាកចេញទៅ មិនចង់សហការជាមួយសមត្ថកិច្ច ខណៈនោះលោកវរសេនីយ៍ត្រី ហួត គង់ ក៏បានស្រែកបញ្ជាទៅលោកព្រិន្ទបាលឯក ប៊ុន សុវណ្ណវឌ្ឍនា ដែលជាមន្រ្តីប៉ុស្តិ៍នគរបាលរដ្ឋបាលទន្លេបាសាក់ ធ្វើការដកសោរម៉ូតូពីពួកគាត់ខាងលើ ដើម្បីអញ្ជើញពួកគាត់ទៅបំភ្លឺនៅប៉ុស្តិ៍នគរបាលរដ្ឋបាលទន្លេបាសាក់។VID_20250830_125950_085.mp4
ស្នងការដ្ឋាននគរបាលរាជធានីភ្នំពេញបានបញ្ជាក់ថា បន្ទាប់មកពួកគាត់ក៏បានសហការជាមួយសមត្ថកិច្ចយល់ព្រមទៅបំភ្លឺនៅប៉ុស្តិ៍នគរបាលទន្លេបាសាក់ ក្រោយពីបំភ្លឺរួចហើយសមត្ថកិច្ចក៏បានអនុញ្ញាតឲ្យពួកគាត់ចាកចេញទៅ ដោយមិនបានឃាត់ខ្លួនពួកគាត់នោះទេ។
ប៉ុន្តែទោះបីយ៉ាងណា ករណីលោកអធិការរងខាងលើ ប្រធានអង្គភាពក៏បានអញ្ជើញគាត់មកធ្វើការណែនាំអប់រំនិងធ្វើកិច្ចសន្យាដែលបំពេញភារកិច្ចប្រើពាក្យសំដីនិងកាយវិកាមិនសមរម្យ៕KD