ខេត្តសៀមរាប ៖ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ Dieguement and Communication (DMC) ដែលមកពីសកលវិទ្យាល័យភូមិន្ទភ្នំពេញ មានលោក-លោកស្រី វាគ្មិន និងសហការចំនួន ១០នាក់ បានរៀបចំ សិក្ខាសាលាលើកកម្ពស់ការយល់ដឹងគោលការណ៍ណែនាំសុវត្ថិភាពយេនឌ័រសម្រាប់ស្ថាប័នប្រព័ន្ធផ្សព្វផ្សាយកម្ពុជា ដោយមានការអញ្ជើញចូលដោយលោក-លោកស្រី មកពីមន្ទីរព័ត៌មានខេត្ត និងលោក-លោកស្រី មកពីអង្គភាពសារព័ត៌មាន ចំនួន ២៥រូប ក្នុងសាលប្រជុំនៃ សណ្ឋាគារ Landing Gold by Amatak សៀមរាប នារសៀលថ្ងៃទី២១ ខែកុម្ភៈ ឆ្នាំ២០២៥។
ដើម្បីជួយបំពេញនូវចន្លោះខ្វះខាតទាំងនេះ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC) ក្នុងការសហការជាមួយអង្គការ UNESCO និងក្រុមអ្នកស្រាវជ្រាវបានរៀបចំ គោលការណ៍ណែនាំសុវត្ថិភាពយេនឌ័រសម្រាប់ ស្ថាប័នប្រព័ន្ធផ្សព្វផ្សាយកម្ពុជា។ គោលការណ៍នេះបានសម្របតាមគោលការណ៍ណែនាំនៃការអនុវត្តអន្តរជាតិ និងសូចនាករយេនឌ័ររបស់ UNESCO ឱ្យសមស្របនឹងបរិបទក្នុងស្រុក ហើយវាបានទទួលការពិគ្រោះយោបល់ និងពិនិត្យផ្ទៀងផ្ទាត់ពីភាគីពាក់ព័ន្ធនៅក្នុងវិស័យសារព័ត៌មាន និងស្ថាប័នដែលលើកស្ទួយសមភាពយេនឌ័រ ក្នុង គោលបំណងបង្កើតបរិយាកាសការងារដែលមានសុវត្ថិភាព និងបរិយាបបន្ន ដោយការដោះស្រាយហានិភ័យ និង វិសមភាពយេនឌ័រ។
សារព័ត៌មាន គឺជាមូលដ្ឋានគ្រឹះមួយនៃលទ្ធិប្រជាធិបតេយ្យ និងគណនេយ្យភាពសង្គម បើទោះជាយ៉ាងណា សុវត្ថិភាព និងសុខុមាលភាពរបស់អ្នកសារព័ត៌មាន ជាពិសេសអ្នកសារព័ត៌មានជាស្ត្រី និង LGBTQ+ នៅតែជាបញ្ហា ប្រឈមធំនៅកម្ពុជា។ អ្នកសារព័ត៌មានជាស្ត្រី និង LGBTQ+ ប្រឈមនឹងការគំរាមកំហែងផ្នែកយេនឌ័រ ដូចជា ការ វាយប្រហារតាមអនឡាញ ការបៀតបៀនផ្លូវភេទ ការរើសអើង និងការការពារមិនគ្រប់គ្រាន់ក្នុងនៅក្នុងវិស័យសារ ព័ត៌មាន។ បញ្ហាទាំងនេះកើតឡើងដោយសារវិសមភាពជាប្រព័ន្ធ ការខ្វះតំណាងក្នុងតំណែងជាអ្នកដឹកនាំ និងការខ្វះ គោលការណ៍ណែនាំសុវត្ថិភាពយែនឌ័រសម្រាប់ស្ថាប័នសារព័ត៌មាន។
ការសិក្សានៅឆ្នាំ២០២០ របស់អង្គការ UNESCO បានបង្ហាញថា ៧៣% នៃអ្នកសារព័ត៌មានស្ត្រីនៅក្នុងប្រព័ន្ធ ផ្សព្វផ្សាយនៅទូទាំងពិភពលោកជួបប្រទះជាមួយអំពើហិង្សាតាមរយៈអ៊ីនធឺណេត។ ខណៈនៅក្នុងឆ្នាំ ២០២៣ ប្រទេសកម្ពុជាមានតែ ៩.៤% នៃអ្នកសារព័ត៌មានជាស្ត្រី ហើយកាន់តែតិចទៅៗនៅក្នុងតំណែងជាអ្នកដឹកនាំ សម្រេចចិត្តនៅក្នុងស្ថាប័នសារព័ត៌មាន។ លើសពីនេះ ការសិក្សានៅឆ្នាំ២០២៣ របស់ UNESCO ដដែលបានរក ឃើញថា ស្ថាប័នសារព័ត៌មានភាគច្រើននៅកម្ពុជាខ្វះគោលនយោបាយស្តីពីសមភាពយេនឌ័រ ឬសុវត្ថិភាពសម្រាប់ អ្នកសារព័ត៌មានជាស្ត្រី៕KD