រាជធានីភ្នំពេញ៖សមត្ថកិច្ចតាមបណ្តាអធិការរដ្ឋាននគរបាលខណ្ឌទាំង ១៤ បានធ្វើការចុះបង្ក្រាបទីតាំងល្បែងខុសច្បាប់ចំនួនជិត៣០កន្លែង និងឃាត់ខ្លួនមនុស្សចំនួន៦០នាក់ ត្រឹមព្រឹកថ្ងៃទី១៨ ខែកញ្ញា ឆ្នាំ២០២២។
លោកវរសេនីយ៍ឯក សាន សុខសីហា អ្នកនាំពាក្យ ស្នងការដ្ឋាននគរបាលរាជធានីភ្នំពេញ បានឲ្យដឹងថា បន្ទាប់ពីទទួលបានបទបញ្ជាដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានបើកកិច្ចប្រជុំបន្ទាន់ ដើម្បីចាត់វិធានការបង្រ្កាបល្បែងសុីសងខុសច្បាប់គ្រប់ប្រភេទទូទាំងរាជធានីភ្នំពេញ។ សមត្ថកិច្ចបានឆ្មក់ចុះបង្ក្រាបទីតាំងកត់ឆ្នោតវៀតណាមបានចំនួន ២៥កន្លែង និងឃាត់ខ្លួនមនុស្សចំនួន៣៣នាក់ រួមមានខណ្ឌបឹងកេងចំនួន ១១នាក់ , ខណ្ឌកំបូលចំនួន ០៨នាក់ ខណខណ្ឌទួលគោកចំនួន ០៦នាក់ ខណ្ឌឫស្សីកែវចំនួន ០៣នាក់ ខណ្ឌជ្រោយចង្វារចំនួន ១១នាក់ និងខណ្ឌមានជ័យចំនួន ០១នាក់។
លោកវីរៈសេនីយ៍ឯកបានបន្តថា ករណីភ្នាល់តាមអនឡាញ ក៍បានចុះចាប់ចំនួន ០២ទីតាំង ឃាត់ខ្លួនមនុស្សបានចំនួន ០៣នាក់ ក្នុងនោះខណ្ឌច្បារអំពៅឃាត់បានចំនួន ០២នាក់ ខណ្ឌសែនសុខឃាត់បានចំនួន ០១នាក់ រួមនិងករណីលេងបៀចិន បង្ក្រាបបានចំនួន ០១ទីតាំងនៅខណ្ឌសែនសុខ និងឃាត់ខ្លួនមនុស្សបានចំនួន ១៦នាក់ផងដែរ៕KLD
