សម្ដេចតេជោ ហ៊ុន សែន ថា លោកសាពូនមីដាដា មិនត្រឹមតែបំផ្លាញខ្លួនឯងទេតែ ចង់បំផ្លាញដល់ សម្ដេចទាំងទ្វេ(ពុកម៉ែ)តាមរយះការបង្ហោះសារ ថាសម្ដេចជួយគាត់ចំនួនរហូត ៦,៧លានដុល្លារ

រាជធានីភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ថា លោកសាពូនមីដាដា មិនត្រឹមតែបំផ្លាញខ្លួនឯងទេតែចង់បំផ្លាញដល់ សម្ដេចទាំងទ្វេ(ពុកម៉ែ)តាមរយះការបង្ហោះសារ ថាសម្ដេចជួយគាត់ចំនួន ៦,៧លានដុល្លារបែបនេះទៅវិញ។ នេះបើយោងតាមសំណេរដែលបានបង្ហោះនៅលើ facebook ផ្លូវការរបស់សម្ដេច តេជោ នៅព្រឹកថ្ងៃទី ២៤ ខែមេសាឆ្នាំ ២០២៤ នេះ។ សម្ដេចតេជោ ហ៊ុន សែន បានសរសេរថា «លោកសាពូនមីដាដាបានបង្ហោះសារដោយនិយាយថាខ្ញុំនិងភរិយាបានជួយគាត់ចំនួន6,7លានដុល្លារព្រមទាំងផ្ទះនិងឡាន។ ច្រើនណាស់កូនបើកូនទទួលបានមែនតើកូនយកទៅណា?។ តើកូនឆ្កួតឬក៏ឡប់ឬចង់អួតទៅអ្នកដ៏ទៃ? ជាង១០ឆ្នាំមុនពុកម៉ែបានហៅកូនទាំងពីរនិងចៅទៅលេងផ្ទះមានឯករាជ្យនិងបានផ្តល់ប្រាក់៣០មុឺនដុល្លារសម្រាប់ពួកកូនទិញផ្ទះនៅ។ ក្រោយមកដោយឃើញថាមារយាទកូនទាំងពីរមិនកើតពុកម៉ែបដិសេដ្ឋមិនជួយកូនទៀតទេទោះកូនបានសុំមកទៀតដើម្បីបង់រំលោះផ្ទះដែលកូនប្រាប់ថាទិញផ្ទះចំនួន៤ដែលគ្មានលុយបង់រំលោះឲ្យគេ។ កូនប្រុសពុកម៉ែមានចិត្តចង់ជួយកូនតែកូនមិនត្រឹមតែបំផ្លាញខ្លួនឯងទេតែកូនចង់បំផ្លាញដល់ពុកម៉ែតាមរយះការបង្ហោះសារបែបនេះទៅវិញ។ លុយជិត៧លានដុល្លារវាច្រើនណាស់ដែលពុកគ្មានលទ្ធភាពផ្តល់ឲ្យកូននោះឡើយ»។សូមជម្រាបជូនផងដែរថា កាលដែលសម្ដេចលើកឡើងយ៉ាងដូច្នេះ គឺឆ្លើយតបទៅនឹង សំណេររបស់ លោក សាពូនមីដាដា នៅលើ facebook ផ្លូវការរបស់លោកដែលមានឈ្មោះ Sapoun Mi Dada ថា «( សម្ពាយបុណ្យកុសលលាភជ័យព្រះឥន្ទប្រទានកាលពីជាង11ឆ្នាំមុន ) ប្រាក់ 6លាន7សែន$ ព្រមទាំងផ្ទះវីឡានៅបុរីប៉េងហួតបឹងស្នោនិងឡានម៉ាកសេឺដេសពណ៌ក្រហម ខ្សែរកប្រាំតម្លឹង ស្រោបពេជ្រ12ការ៉ាត ដែលសម្តេចពុកនិងសម្តេចម៉ែប្រទានឲ្យមកកូនៗ ត្រូវបានរលាយដោយដៃខ្ញុំបាទ ខ្ញុំបាទជាបុរសកញ្ជើធ្លុះ អតីតភរិយាខ្ញុំបាទគាត់ស្លូតស្មោះត្រង់ណាស់ គាត់មិនបានដឹងរឿងអ្វីទេ សូមសម្តេចពុកសម្តេចម៉ែមេត្តាករុណាអនុគ្រោះផងទាន ( មហាគុណធំធេងណាស់ ) កូនសូមសច្ចាកើតគ្រប់ជាតិណាៗកូនសូមបម្រើដោយឆន្ទះស្មោះត្រង់បំផុតចំពោះសម្តេចពុកសម្តេចម៉ែគ្រប់ៗជាតិព្រះបាទទានប្រោស❤️❤️»៕KD