ខេត្តសៀមរាប៖ កាលពីវេលាម៉ោង ២១ និង៣០នាទីថ្ងៃទី១២ ខែមេសា ឆ្នាំ២០២៤ អ្នកបើកបររថយន្ត TOYOTA LANCRUISER ពណ៌ខ្មៅ ពាក់ផ្លាកលេខកម្ពុជា R.J.1779 ដែលបុកម៉ូតូមួយគ្រឿងម៉ាក HONDA ពណ៌ខ្មៅ ផ្លាកលេខ សៀមរាប 1M-6731 សម្លាប់យុវជនម្នាក់ លើផ្លូវពីផ្សារក្រោមទៅផ្លូវបំបែកត្រៀក ត្រង់ចំណុចខាងត្បូងឱសថស្ថានសុភមង្គល ៥០ម៉ែត្រ ស្ថិតក្នុងភូមិវិហាចិន សង្កាត់ស្វាយដង្គុំ ក្រុងសៀមរាប ខេត្តសៀមរាប នោះ ត្រូវបានឃាត់ខ្លួនបញ្ជួនទៅស្នងការដ្ឋាននគរបាលខេត្តសៀមរាប ដើម្បីស្រាវជ្រាវ និង កសាងសំណុំរឿងតាមនីតិវិធី បញ្ជូនទៅសាលាដំបូងខេត្តហើយ។ នេះបើយោងតាមការឱ្យដឹង របស់ លោក វរសេនីយ៍ទោ សោម វីរ: នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប មកកាន់ ទីភ្នាក់ងារព័ត៌មាន គូលែន ដេលី នៅរសៀលថ្ងៃទី ១៤ ខែមេសា ឆ្នាំ២០២៤នេះ។
លោក វរសេនីយ៍ទោ សោម វីរ: ថា មានរថយន្តមួយគ្រឿងម៉ាក TOYOTA LANCRUISER ពណ៌ខ្មៅ ពាក់ផ្លាកលេខ កម្ពុជា R.J.1779 បើកបរដោយឈ្មោះ ខាណាហ្គារ៉ាច ណាវ៉ារ៉ាច ភេទ ប្រុសអាយុ ៤៥ឆ្នាំ សញ្ជាតិខ្មែរ រស់នៅភូមិសាលាកន្សែង សង្កាត់ស្វាយដង្គុំ ក្រុងសៀមរាប ខេត្តសៀមរាប ទិសដៅពីជើងទៅត្បូង ទៅបុកម៉ូតូមួយគ្រឿងម៉ាក HONDA ពណ៌ខ្មៅ ផ្លាកលេខ សៀមរាប 1M – 6731 បើកបរដោយឈ្មោះ ពែក ភារម្យ ភេទប្រុស អាយុ ១៩ឆ្នាំ រស់នៅភូមិគោកក្រសាំង សង្កាត់ស្វាយដង្គំក្រុងសៀមរាប ខេត្តសៀមរាប ទិសដៅពីត្បូងទៅជើង។
លោក វរសេនីយ៍ទោ សោម វីរ: បានបន្តថា បន្ទាប់មករថយន្តម៉ាក TOYOTA LANCRUISER ទៅបុកម៉ូតូមួយគ្រឿងម៉ាកHONDAពណ៍ខ្មៅ ពាក់ផ្លាកលេខ សៀមរាប 1 AH-9103 ដែលចតនៅលើផ្លូវខាងលិចម្ចាស់ឈ្មោះឈឹម ចាន់រឹទ្ធីភេទប្រុសអាយុ៣០រស់នៅភូមិស្ទឹងថ្មីសង្កាត់ស្វាយដង្គំក្រុងសៀមរាប ខេត្តសៀមរាប។
លោក វរសេនីយ៍ទោ សោម វីរ: បញ្ជាក់ថា សមត្ដកិច្ចបានសន្និដ្ឋានមូលហេតុបណ្ដាលឱ្យគ្រោះថ្នាក់ចរាចរណ៍នេះ
មកពី អ្នកបេីកបររថយន្តម៉ាក LAND CRUISER ពាក់ផ្លាកលេខ កម្ពុជា R.J.1779 បើកបរឡើងជែងខ្វះការប្រុងប្រយ័ត្ន និងបានបណ្ដាលឲ្យ ស្លាប់មនុស្សម្នាក់ ឈ្មោះ ពែក ភារម្យ អ្នកបើកបរ ម៉ូតូផ្លាកលេខ 1M-6731 មិនពាក់មួកសុវត្ថិភាព ខូចខាតរថយន្តធ្ងន់ ០១ គ្រឿង ខូចខាតម៉ូតូ ធ្ងន់០១គ្រឿង និង ស្រាល០១គ្រឿង៕KD 
