ខេត្តសៀមរាប៖ អាជ្ញាធរជាតិអប្សរាថា សួនរុក្ខជាតិអង្គរមានទំហំផ្ទៃដីប្រមាណ១៥ហិកតា ដែលបានបើកដំណើរការជាផ្លូវការកាលពីឆ្នាំ២០២២កន្លងមក ឥឡូវនេះ អាជ្ញាធរជាតិអប្សរាកំពុងរៀបចំពង្រីកឱ្យធំជាងមុន ពីទំហំ១៥ហិកតា ទៅ១៥០ហិកតា ដើម្បីបម្រើឱ្យវិស័យទេសចរណ៍លក្ខណៈធម្មជាតិកាន់តែសម្បូរបែប តែប៉ុណ្ណោះ ហើយគ្មានក្រុមហ៊ុនណាមួយទទួលបានសិទ្ធិ អភិវឌ្ឍន៍ហ៊ំរបងព័ទ្ធយកដី ក្នុងតំបន់អង្គរ ធ្វើជាកម្មសិទ្ធិនោះឡើយ។
លោក ឡៃ ប៉ូទី អនុប្រធាននាយកដ្ឋានគ្រប់គ្រង ទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា មានប្រសាសន៍ នៅពីរសៀលថ្ងៃទី២១ ខែមីនា ឆ្នាំ២០២៤នេះថា អាជ្ញាធរជាតិអប្សរាមានគម្រោងពង្រីក សួនរុក្ខជាតិអង្គរពីទំហំ១៥ហិកតារទៅ១៥០ហិកតា ដោយធ្វើរបងសម្រាប់ដោះលែងសត្វព្រៃ និងការពារព្រៃឈើ រៀបចំផ្លូវដើរ ស្ពានថ្មើរជើងសម្រាប់ទេសចរដើរកម្សាន្តក្នុងព្រៃធម្មជាតិ។ នៅក្នុងគម្រោងពង្រីកផ្ទៃដីសួនរុក្ខជាតិអង្គរនេះ គឺអាជ្ញាធរជាតិអប្សរា បានដាំបង្គោលស៊ីម៉ង់ត៍ និងព័ទ្ធលួសសំណាញ់ប្រវែង៥៤៦៨ម៉ែត្រជុំវិញព្រៃ ចាប់ពីសួនរុក្ខជាតិអង្គរ រហូតទៅដល់កសិន្ធុអង្គរភាគខាងត្បូង បំណងធ្វើជាទីធ្លាសម្រាប់ព្រលែងសត្វព្រៃជាច្រើនប្រភេទឱ្យរស់នៅតាមលក្ខណៈធម្មជាតិរបស់វា ដែលទេសចរក៏អាចទស្សនាសត្វព្រៃទាំងនេះដោយផ្ទាល់ តាមរយៈផ្លូវថ្មើរជើងក្នុងព្រៃ។
សូមជម្រាបជូនផងដែរថា ថ្មីៗនេះបណ្ដាញសង្គមមួយចំនួន បានបង្ហោះដោយធ្វើការចោទប្រកាន់មកលើស្ថាប័ននេះថា មានក្រុមហ៊ុនទទួលបានសិទ្ធិអភិវឌ្ឍន៍ដី ក្នុងតំបន់អង្គរ ហើយចាប់ផ្ដើមធ្វើរបងហ៊ំព័ទ្ធជាបណ្ដើរៗ ដោយជ្រកក្រោមស្លាកអាជ្ញាធរជាតិអប្សរា។
ទន្ទឹមនេះ អាជ្ញាធរជាតិអប្សរា ស្នើបញ្ឈប់ការផ្សព្វផ្សាយក្នុងបណ្តាញសង្គមដែលផ្ទុយពីការពិត ដែលបង្កជាការបំផ្លើសព័ត៌មានក្នុងន័យអវិជ្ជមាន ធ្វើឱ្យប៉ះពាល់ដល់កិត្តិយសស្ថាប័នជាតិ និងកិច្ចខិតខំប្រឹងប្រែងទាក់ទាញភ្ញៀវទេសចរមកទស្សនានៅរមណីយដ្ឋានអង្គរ៕KD
អត្ថបទ: លោក យី សុថា
រូបភាព: លោក ឡៃ ប៉ូទី និងលោក ភោគ ជា
