Saturday, February 24, 2024

សមត្ថកិច្ចបើកយុទ្ធនាការបោសសម្អាតល្បែងស៊ីសង បានបង្រ្កាបបទល្មើសជល់មាន់ខុសច្បាប់ ឃាត់បានមនុស្ស ៥នាក់ រួមនិងវត្ថុតាងជាច្រើន

ខេត្តព្រៃវែង៖ កម្លាំងអន្តរាគមន៍ នៃស្នងការដ្ឋាននគរបាលខេត្តព្រៃវែង ចុះស្រាវជ្រាវបង្ក្រាបបទល្មើសល្បែងស៊ីសងខុសច្បាប់ (ប្រជល់មាន់លើដី) ឃាត់បានមនុស្សចំនួន ៥នាក់ រួមនិងវត្ថុតាងមាន់ជល់ និងឧបករណ៍សម្ភារៈលេងល្បែងជាច្រើន បញ្ជូនមកស្នងការដ្ឋានគរបាលខេត្តព្រៃវែង នៅចំណុចចម្ការស្វាយមួយកន្លែង ស្ថិតនៅភូមិស្វាយសាក់ ឃុំពោធិ៍ទី ស្រុកស៊ីធរកណ្ដាល ខេត្តព្រៃវែង កាលពីវេលាម៉ោង ១៣ និង ១៥នាទីថ្ងៃទី ០៤ ខែ កុម្ភៈ ឆ្នាំ ២០២៤កន្លងទៅ។សមត្ថកិច្ចថា ជនសង្ស័យទាំង ០៥នាក់ ដែលត្រូវបានឃាត់ខ្លួន ទី១ មានឈ្មោះ វិន មករា ភេទប្រុស អាយុ ៤២ឆ្នាំ រស់នៅភូមិស្វាយសាក់ ឃុំពោធិ៍ទី ស្រុកស៊ីធរកណ្ដាល, ទី២ ឈ្មោះ ឈិន ហ៊ាញ ភេទប្រុស អាយុ ៥៨ឆ្នាំ អ្នកទាំងពីររស់នៅភូមិស្វាយសាក់ ឃុំពោធិ៍ទី ស្រុកស៊ីធរកណ្ដាល, ទី៣ ឈ្មោះ ចែត្រ ខុម ភេទប្រុស អាយុ ៦៣ឆ្នាំ រស់នៅភូមិឡាំឡូង ឃុំជ្រៃឃ្មុំ ស្រុកស៊ីធរកណ្ដាល, ទី៤ ឈ្មោះ ជាម ឡាយ ភេទប្រុស អាយុ ៥៨ឆ្នាំ រស់នៅភូមិព្រៃកណ្ដៀង ឃុំព្រៃកណ្ដៀង ស្រុកពាមរក៍ ខេត្តព្រៃវែង និងទី៥ ឈ្មោះ អ៊ាន វាសនា (ហៅពៅ ហៅដុល្លារ) ភេទប្រុស អាយុ ៣៤ឆ្នាំ រស់នៅភូមិស្វាយសាក់ ឃុំពោធិ៍ទី ស្រុកស៊ីធរកណ្ដាល ខេត្តព្រៃវែង ។

សមត្ថកិច្ចបន្តថា វត្ថុតាង និងសម្ភារៈចាប់យករួមមាន រថយន្ត ១គ្រឿង, ម៉ូតូ ៥គ្រឿង, មាន់ជល់ ៧ក្បាល, ស៊ុមក្រុងមាន់ ១៦ស៊ុម, ឧបករណ៍សម្រាប់លេងអាប៉ោង ១ឈុត, ជញ្ជីងថ្លឹងមាន់ ១គ្រឿង, ស្កុតរំខ្នាយមាន់ ១ដុំ, កៅអីជ័រចំនួន ២០, ធុងទឹកកក ១, តុដែក ១ និងឆ្នាំងបាយចំនួន ១ ។

សមត្ថកិច្ចបញ្ជាក់ថា បច្ចុប្បន្ន ជនសង្ស័យទាំង ៥នាក់ រួមនិងវត្ថុតាង នគរបាលជំនាញ នៃស្នងការដ្ឋាននគរបាលខេត្តព្រៃវែង កំពុងបំពេញនីតិវិធី ដើម្បីបញ្ជូនទៅតុលាការ ៕KD

អត្ថបទស្រដៀងគ្នា

ព័ត៌មានពេញនិយម