លោកឧកញ៉ា ភិរម្យ វិចិត្រដារ៉ា រងការផាកពិន័យ ក្នុងករណីបើកបរលើសល្បឿនកំណត់ និងត្រូវបង្ខំឱ្យដោះភ្លើងដែលខុសបច្ចេកទេស

ខេត្តព្រះវិហារ៖ លោកឧកញ៉ា ភិរម្យ វិចិត្រដារ៉ា រងការផាកពិន័យ ក្នុងករណីបើកបរលើសល្បឿនកំណត់ និងត្រូវបង្ខំឱ្យដោះភ្លើងដែលខុសបច្ចេកទេស នៅក្នុងភូមិសាស្ត្រខេត្តព្រះវិហារ។ នេះបើយោងតាមការបង្ហោះ ចែករំលែកដោយ គណនេយ្យហ្វេសប៊ុកផ្លូវការការ របស់ លោកដែលមានឈ្មោះ «ឧកញ៉ា ភិរម្យ វិចិត្រដារ៉ា» ដែលបានផ្សាយផ្ទាល់ វីដេអូរយៈពេល ៧នាទី និង២១វិនាទី នៅព្រឹកថ្ងៃទី ០៣ ខែកុម្ភៈ ឆ្នាំ២០២៤នេះ។

លោកឧកញ៉ា ភិរម្យ វិចិត្រដារ៉ា ដែលកំពុងរងការផាកពិន័យ ហាក់បង្ហាញការមិនពេញចិត្ត ចំពោះការកំណត់ល្បឿន ៦០គម/ម «សូមគោរពច្បាប់ចរាចរណ៍ទាំងអស់គ្នា

សូមណូមពរ កុំអោយចាំចាប់ល្បឿន ៤០ ទៅ ៦០km/h អី (ខ្ញុំអោយតៃកុងឡាន បើក៨០kh/h តែមកជាប់៦០km/h )»។

លោកឧកញ៉ា ភិរម្យ វិចិត្រដារ៉ា បានបញ្ជាក់បែបចំអកថា «យកថវិការជូនរដ្ឋ កុំដាក់ចូលប្រអប់ ឯកជន

សូមដាក់ផ្លាក់ល្បឿនអោយ ធំ និង ច្បាស់ បន្តិច

បើប្រជាពលរដ្ឋ ខ្វះខាតអី អប់រំ យោគយល់ផង !

សូមមានក្រមសីលធម៌ ទាំងអស់គ្នា»។

សូមជម្រាបជូនផងដែរថា រថយន្តដែលលោកឧកញ៉ាភារម្យ វិចិត្រដារ៉ា បានធ្វើដំណើរនោះម៉ាក់ Toyota Tundra ពណ៌លឿងក្រម៉ៅ ផ្លាកលេខ ភ្នំពេញ ២AK-១៦៩៩ ដែលមានតៃកុងឈ្មោះ យី វណ្ណា បានបើកបរក្នុងល្បឿន ៨៤គម/ម ដោយលើសល្បឿនកំណត់ ២០ ទៅ ២៩គម/ម និងត្រូវរងការផាកពិន័យ ចំនួន ១៥ម៉ឺនរៀល ហើយថែមទាំងត្រូវបានដក ពិន្ទុលើប័ណ្ណបើកបរចំនួន ២ពិន្ទុផងដែរ។

ទីបីជាយ៉ាងណា ទីភ្នាក់ងារសារព័ត៌មានគូលែដេលី នៅមិនទាន់ទទួលបានការបកស្រាយណាមួយពីសមត្ថកិច្ច ដែលកំពុងអនុវត្តច្បាប់នោះ នៅឡើយទេ៕KD