ខេត្តសៀមរាប៖ មន្ត្រីពន្ធធានាគារខេត្តសៀមរាប នាំយកអ្នកទោសទៅព្យាបាលមាត់ធ្មេញ ត្រូវជនសង្ស័យ មិនស្គាល់អត្តសញ្ញាណ មានគ្នាប្រហែល 06នាក់ បានចូលទៅធ្វើសកម្មភាពប្លន់រំដោះយកអ្នកទោស ពីក្នុងគ្លីនិកព្យាបាលមាត់ធ្មេញយីហោ ជុំ ចិន្ដា ដែលមានទីតាំងនៅក្បែរហាងបបរសរាជនី ស្ថិតនៅភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប នៅវេលាម៉ោង08 និង 45នាទីថ្ងៃទី17 ខែសីហា ឆ្នាំ2023នេះ។
ប្រភពថា ក្នុងករណីប្លន់រំដោះយកអ្នកទោសនេះ ជនសង្ស័យបានប្រើប្រាស់រថយន្ត Lexus Rx330 ពណ៌ទឹកសមុទ្រ ផ្លាកលេខ ភ្នំពេញ 2AA-4315 និងមានប្រដាប់ដោយអាវុធទំនើបគ្រប់ដៃផងដែរ។
ប្រភពបន្តថា បុគ្គលិកនៅខាងក្នុងគ្លីនិកថា ស្មានតែគេថតវីដេអូ ប្រែងៗ ទើបពួកគាត់មិនសូវមានការភិតភ័យ។
ប្រភពបញ្ជាក់ថា បន្ទាប់ពីធ្វើសកម្មភាពប្លន់រំដោះអ្នកទោសរួច ជនល្មើសបានយករថយន្តទៅប្លុងចោល នៅក្រោយបុរីអាក់ខេដ ដែលស្ថិត ក្នុងភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប នៅវេលាម៉ោងប្រមាណ 11 និង 40នាទី ព្រឹកថ្ងៃដដែល។ ភ្លាមសមត្ថកិច្ច បានចុះធ្វើការត្រួតពិនិត្យក្នុងរថយន្ត រកឃើញកាំភ្លើង ចំនួន 05ដើម និងសម្ភារធ្វើសកម្មភាពមួយចំនួនទៀត។
ទោះបីជាយ៉ាងណាសមត្ថកិច្ច នៅពុំទាន់អាចឆ្លើយបំភ្លឺ ឱ្យបានពិស្ដារជុំវិញករណីនេះបាននៅឡើយទេ(ព័ត៌មានបឋម)៕នាគស 
