ខេត្តសៀមរាប៖ កុមារាម្នាក់ស្លាប់បាត់បង់ជីវិត ដោយសាររថយន្តទឹកបរិសុទ្ធអុីវ៉ា (Eva)កិន វេលាម៉ោង ១០ និង ០០នាទី ថ្ងៃទី ១០ ខែមិថុនា ឆ្នាំ២០២៣។
ប្រភពពីកន្លែងកើតហេតុបានឱ្យដឹងថា សិស្សសាលា យូអុីស អេ ម្នាក់បានជិះកង់មួយគ្រឿងពណ៍ទឹកប្រាក់ ចេញពីរៀនត្រលប់ទៅផ្ទះវិញ តាមបណ្ដាយផ្លូវ អាចារ្យ ហែម ចៀវ (ផ្លូវវត្តបូព៌) ក្នុងទិសដៅពីរជើងទៅត្បូង លុះមកដល់ត្រង់ចំណុចភ្លើងស្តុកវត្តដំណាក់ ដែលស្ថិតក្នុងភូមិវត្តដំណាក់សង្កាត់សាលាកំរើក ក្រុងសៀមរាប ខេត្តសៀមរាប ក៍ត្រូវបានរថយន្តដឹកទឹកបរិសុទ្ធរបស់ ក្រុមហ៊ុន អុីវ៉ា (Eva) ម៉ាក HYUNDAI ពណ៌ស ពាក់ផ្លាកលេខ ២AE- ៨៤៧៧ ដែលបើកបរស្របទៅគ្នា កិនបណ្ដាលឲ្យស្លាប់ ក្រោយពីយកទៅជួយសង្គ្រោះនៅគ្លីនិកឯកជនមួយ។
ប្រភពដដែលបានបន្តថា កុមារាដែលបានស្លាប់នោះមានឈ្មោះ ដេវីត អាយុ ៩ឆ្នាំ រស់នៅភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប ជាសិស្សរៀនថ្នាក់ទី ៥ នៃសាលា អន្តរជាតិ យូ អេស អេ (USA international school) ចំណែកអ្នកបើកបរមិនស្គាល់អត្តសញ្ញាណ ក្រោយពេលកើតហេតុបានរត់គេខ្លួនបាត់ស្រមោល។
ប្រភពបញ្ជាក់បានថា បន្ទាប់ពីស្វែងរកសាច់ញាតិឃើញហើយនោះ សមត្ថកិច្ចបានប្រគល់សពជូនសាច់ញាតិក្រុមគ្រួសារ យកទៅធ្វើបុណ្យតាមប្រពៃណី នៅឈាបនដ្ឋានវត្តស្វាយ ដែលស្ថិតនៅក្នុងភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប។ចំណែកវត្ថុតាង ក្រោយធ្វើការវាស់វែង សមត្ថកិច្ចបានយកទៅរក្សាទុក នៅស្នងការដ្ឋាននគរបាលខេត្តសៀមរាប ដើម្បីកសាងសំណុំរឿងចាត់ការបន្តតាមនីតិវិធី៕នាគស
