ខេត្តសៀមរាប៖ មនុស្សប្រុសស្រី ០៣នាក់បានស្លាប់ និងរបួសធ្ងន់ ក្នុងករណីគ្រោះថ្នាក់ចរាចរណ៍រវាងរថយន្ត និងម៉ូតូ នៅលើផ្លូវជាតិលេខ៦ ត្រង់ចន្លោះបង្គោលគីឡូម៉ែត្រ ២៤៣ និង ២៤៤ ដែរស្ថិតនៅក្នុងភូមិកំពង់ក្តី២ ឃុំកំពង់ក្តី ស្រុកជីក្រែង ខេត្តសៀមរាប កាលពីវេលាម៉ោង ១៩ និង ៣០នាទីថ្ងៃទី៣០ ខែឧសភា ឆ្នាំ២០២៣។
សមត្ថកិច្ចបានឱ្យដឹងថា មានករណីគ្រោះថ្នាក់ចរាចរណ៍មួយកើតឡើង រវាងរថយន្តមួយគ្រឿងម៉ាក Hyundai ពាក់ផ្លាកលេខ ភ្នំពេញ 3G-0126 សេរីឆ្នាំ២០០៣ អ្នកបើកបរមានឈ្មោះ ឃុន សុខលាប ភេទប្រុស អាយុ ២៧ឆ្នាំ ទីលំនៅបច្ចុប្បន្នស្ថិតក្នុងភូមិគិរី សង្កាត់អូស្មាច់ ក្រុងសំរោង ខេត្តឧត្តរមានជ័យ បើកបរក្នុងទិសដៅពីកើតទៅលិច និងម៉ូតូមួយគ្រឿងម៉ាក Honda Dream សេរីឆ្នាំ២០១៥ ពណ៌ខ្មៅ ពាក់ផ្លាកលេខ សៀមរាប 1T-8455 បើកបរក្នុងទិសដៅពីត្បូងទៅជើង បើកបរដោយឈ្មោះ ហ៊ុយ ផៃ ភេទប្រុស អាយុ៥៦ឆ្នាំ មានពាក់មួកសុវត្ថិភាព ទីលំនៅបច្ចុប្បន្នស្ថិតក្នុងភូមិស្លែង ឃុំកំពង់ក្តី ស្រុកជីក្រែង ខេត្តសៀមរាប រួមដំណើរដោយ ឈ្មោះ មុី លេន ភេទស្រី អាយុ៥៩ឆ្នាំ ទីលំនៅបច្ចុប្បន្នស្ថិតក្នុងភូមិស្លែង ឃុំកំពង់ក្តី ស្រុកជីក្រែង ខេត្តសៀមរាប ត្រូវជាប្រពន្ធអ្នកបើកបរ អត់ពាក់មួកសុវត្ថិភាព និង ឈ្មោះ ប៊ត ងួន ភេទស្រី អាយុ៣០ឆ្នាំ អត់ពាក់មួកសុវត្ថិភាព មានទីលំនៅស្ថិតក្នុងភូមិព្រៃធំ ឃុំគោកធ្លកលើ ស្រុកជីក្រែង ខេត្តសៀមរាប។
សមត្ថកិច្ចបន្តថា ក្នុងឧបទ្ទវហេតុនេះបានបណ្ដាលឲ្យ អ្នកបើកបរឈ្មោះ ហ៊ុយ ផៃ រងរបួសធ្ងន់ ឈ្មោះ មុី លេន ត្រូវជាប្រពន្ធអ្នកបើកបរ ស្លាប់បាត់បង់ជីវិត និងឈ្មោះ ប៊ត ងួន រងរបួសធ្ងន់ ចំណែកឯអ្នកបើកបររថយន្ត មិនមានរងរបួសនោះទេ ហើយក៍ត្រូវសមត្ថកិច្ចធ្វើការឃាត់ខ្លួនបានភ្លាមៗផងដែរ។
សមត្ថកិច្ចបញ្ជាក់ថា មូលហេតុដែលបណ្ដាលឲ្យមាន គ្រោះថ្នាក់ចរាចរណ៍នេះ គឺមកពីអ្នកបើកបរទាំងសងខាង បើកបរដោយខ្វះការប្រុងប្រយ័ត្ន។ ក្រោយពេលកើតហេតុ កម្លាំងជំនាញបានចុះធ្វើការវាស់វែង និងប្រមូលវត្ថុតាងពាក់ព័ន្ធ យកទៅរក្សាទុក នៅអធិការដ្ឋាននគរបាលស្រុកជីក្រែង ដើម្បីដោះស្រាយតាមនីតិវិធីច្បាប់៕នាគស 
