ពេលនេះដឹងមូលហេតុ ដែលបណ្ដាលឲ្យ មានអគ្គីភ័យឆាបឆេះ ព្រះរាជដំណាក់ របស់ព្រះករុណា នៅកណ្ដាលក្រុងសៀមរាបហើយ

ខេត្តសៀមរាប៖ សមត្ថកិច្ច នៃស្នងការដ្ឋាននគរបាលខេត្តសៀមរាប បានឲ្យអង្គភាពសារព័ត៌មានគូលែនដេលី ដឹងអំពីមូលហេតុ ដែលបណ្ដាលឲ្យ មានអគ្គីភ័យឆាបឆេះព្រះរាជដំណាក់តូចខាងលិច របស់ព្រះករុណា នៅកណ្ដាលក្រុងសៀមរាបហើយ។

សមត្ថកិច្ចថា ករណីអគ្គីភ័យដ៍គួរឲ្យតក់ស្លុតមួយបានឆាប់ឆេះ ព្រះរាជដំណាក់តូចខាងលិច ដែលមានទំហំប្រមាណ ២៤×១៥ ម៉ែត្រ ស្ថិតក្នុងបរិវេណនៃព្រះរាជដំណាក់សៀមរាប ដែលមានទីតាំងក្នុងភូមិមណ្ឌល ២ សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីវេលាម៉ោង ២១ និង ៣០នាទី ថ្ងៃទី ១២ ខែមីនា ឆ្នាំ ២០២៣។
សមត្ថកិច្ចបានបន្តថា ក្នុងប្រតិបត្តិការពន្លត់ អគ្គីភ័យនេះផងដែរ សមត្ថកិច្ចបានប្រើប្រាស់រថយន្ត ពន្លត់អគ្គីភ័យ តូច-ធំ មានចំនួនរហូតដល់ ១១គ្រឿង ប្រើទឹកអស់ ៣៥ រថយន្ត ថ្មើរហ្នឹងចំណុះទឹក ១១៤ ម៉ែត្រគូប ក្នុងនោះមានការចូលរួមដោយ រថយន្តពន្លត់ស្នងការនគរបាលខេត្ត រថយន្តពន្លត់ភូមិវប្បធម៌ រថយន្តពន្លត់នគរបាលស្រុកពួក រថយន្តនគរបាលស្រុកប្រាសាទបាគង រថយន្ត ពន្លត់អង្គភាពអាវុធហត្ថ និង រថយន្តពន្លត់អគ្គីភ័យរបស់អាជ្ញាធរជាតិអប្សារាផងដែរ ទើបអាចគ្រប់គ្រងបាន និងពន្លត់ជាស្ថាពរ នៅវេលាម៉ោង ០១ និង ០០នាទី រំលងអធ្រាត្រឈានចូលថ្ងៃ ១៣ ខែ មិនា ឆ្នាំ២០២៣។
សមត្ថកិច្ចបានបញ្ជាក់ថា ករណីឆាបឆេះ ព្រះរាជដំណាក់តូចខាងលិចនេះ បានបណ្ដាលឲ្យរងការខូចខាត តួរអាគារនៃព្រះរាជដំណាក់ ប្រហែល ៨០ភារយ និងខូចខាតសម្ភារៈប្រើប្រាស់ ខាងក្នុងមួយចំនួនធំផងដែរ។
សមត្ថកិច្ចបានបញ្ជាក់បន្ថែមថា មូលហេតុ នៃការឆេះខាងលើគឺ បណ្តាលមកពីឆ្លងចរន្តអគ្គីសនី(ទុស្សេខ្សែភ្លើង)៕នាគស