ខេត្តសៀមរាប៖ មានករណីបុរសម្នាក់បានបើករថយន្តម៉ាក TOYOTA TACOMA ពណ៌ទឹកប្រាក់ ផ្លាកលេខ ភ្នំពេញ 2BB-7312 ធ្លាក់លូទឹកស្អុយ កាលពីវេលាម៉ោង ០៧ និង ៣០នាទី ថ្ងៃទី១៩ ខែកុម្ភ: ឆ្នាំ២០២៣។
ប្រភពបានឲ្យដឹងថា ហេតុការណ៍នេះកើតឡើង នៅត្រង់ចំនុចមុខផ្ទះ ឈ្មោះ ផ្លោក រិន ភេទស្រី អាយុ ៦៣ឆ្នាំ ត្រង់ភូមិតាភុល សង្កាត់ស្វាយដង្គុំ ក្រុងខេត្តសៀមរាប។
ប្រភពបន្តថា អ្នកបេីកបរឈ្មោះ ប៊ុន ទី ភេទប្រុស អាយុ ៣៥ឆ្នាំ រស់នៅភូមិវិហាចិន សង្កាត់ស្វាយដង្គុំ ក្រុងខេត្តសៀមរាប។
ប្រភពបញ្ជាក់ថា ហេតុការណ៍គ្រោះថ្នាក់ចរាចរណ៍នេះបានបណ្ដាលឲ្យ ខូចខាតបង្កាន់ដៃលូទឹកស្អុយ ចំនួន ០១ផ្ទាំងធំ ខូចខាតរថយន្តចំនួន ០១គ្រឿងធ្ងន់ធ្ងរ តែមិនបណ្ដាលឱ្យអ្នកណាម្នាក់រងរបួសនៅឡើយ។
បន្ទាប់ពីទទួលបានព័ត៌មាននេះភ្លាម បណ្ដាញសារព័ត៌មានយើង បានព្យាយាមទាក់ទង ទៅកាន់សមត្ថកិច្ច ចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប ដោយលោកបានឆ្លើយថា “ខាងលោកមិនបានធ្វើរបាយការណ៍នោះទេ ដោយសារនេះគឺជាការបង្កហេតុដោយខ្លួនឯង មិនមានរងគ្រោះថ្នាក់ដល់អ្នកដទៃនោះឡើយ។ ហើយម្យ៉ាងវិញទៀតលោកថា បង្កាន់ដៃលូទឹកស្អុយនោះ ក៏វាមានការចាស់ ពុក ទ្រុឌទ្រោមទៅហើយ។ ដូច្នេះភាគីខាងម្ចាស់រថយន្ត ធានាជួសជុលបង្កាន់ដៃស្ពានសង ហើយសុំស្ទូចយករថយន្តទៅជួសជុលខ្លួនឯង”។
ប្រជាពលរដ្ឋក៏បានធ្វើការគោរពស្នើសុំ ដល់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងជាគណៈបញ្ជាការឯកភាពខេត្ត លោកឧត្តមសេនីយ៍ទោ តេងចាន់ណាត ស្នងការនៃស្នងការដ្ឋាននគរបាលខេត្តសៀមរាប លោកស្នងការរង លោកនាយ និងលោកនាយរង ការិយាល័យនគរបាលចរាចរណ៍ផ្លូវគោកខេត្តសៀមរាប មេត្តាជួយរឹតបន្តឹងនូវច្បាប់ចរាចរណ៍ ឱ្យបានមឹងម៉ាត់ ហើយដាក់ទោសទាន់ ទៅតាមច្បាប់ជាធរមាន ចំពោះជនណាដែលបើកបរល្មើសច្បាប់ចរាចរណ៍ ដើម្បីឲ្យខេត្តសៀមរាប ដែលជាខេត្តទេសចរណ៍មួយនេះ ទទួលបាននូវសុវត្ថិភាព ក្នុងការធ្វើដំណើរជូនភ្ញៀវជាតិ និងអន្តរជាតិ ដែលអញ្ជើញមកទស្សនាខេត្តដ៏អស្ចារ្យមួយនេះផង៕នាគស 
