អាជ្ញាធរខេត្តជំរុញដល់អ្នកពាក់ព័ន្ធយកចិត្តទុកដាក់អនុវត្តតួនាទីភារកិច្ចខ្លួនឱ្យបានល្អ ដើម្បីកិត្តិយសខេត្តសៀមរាប សម្រាប់ព្រឹត្តិការណ៍អង្គរសង្រ្កាន្ត

ខេត្តសៀមរាប ៖ អាជ្ញាធរ បានជំរុញដល់គ្រប់មន្ទីរអង្គភាពពាក់ក្នុងខេត្តទាំងអស់ ធ្វើយ៉ាងណាសហការគ្នាឱ្យបានល្អ លើការអនុវត្តតួនាទីភារកិច្ចរបស់ខ្លួន ដើម្បីឱ្យព្រឹត្តិការណ៍អង្គរសង្ក្រាន្តនាពេលខាងមុខនេះដំណើរការទៅដោយរលូន ជាមួយនឹងការទទួលបានភាពរីករាយពីសំណាក់បងប្អូនប្រជាពលរដ្ឋខ្មែរ និងភ្ញៀវទេសចរបរទេស ហើយវាក៏ជាកិត្តិយសសម្រាប់ប្រទេសជាតិយើង ជាពិសេសខេត្តសៀមរាបតែម្ដង។

ក្នុងកិច្ចប្រជុំពិភាក្សាការងារអនុគណៈកម្មការព័ត៌មាន អនាម័យ សុខភាព ផ្គត់ផ្គង់ទឹក និងភ្លើង ក្នុងព្រឹត្តិការណ៍អង្គរសង្រ្កាន្ត ឆ្នាំ២០២៥ ដែលដឹកនាំកិច្ចប្រជុំដោយ លោក នាក់ ណេរ៉ុន និង លោក សុខ ថុល អភិបាលរងខេត្ត នៅថ្ងៃទី០២ ខែមេសា ឆ្នាំ២០២៥នេះ ថ្នាក់ដឹកនាំទាំងពីរ បានជំរុញដល់គ្រប់មន្ទីរអង្គភាពជាសមាជិក ត្រូវខិតខំយកចិត្តទុកដាក់លើការងារមួយចំនួន ក្នុងនោះអង្គភាពអគ្គីសនី ត្រូវត្រួតពិនិត្យឱ្យបានត្រឹមត្រូវនូវខ្សែបណ្តាញភ្លើង ដើម្បីធានាឱ្យបាននូវសុខសុវត្ថិភាពក្នុងព្រឹត្តិការណ៍។ មន្ទីរបរិស្ថាន ត្រូវរៀបចំឱ្យមានបង្គន់អនាម័យចល័តនៅតាមគោលដៅដែលបានកំណត់ ទាំងការសម្អាតអនាម័យ បរិស្ថាន ព្រមទាំងការដឹកជញ្ជូនសំរាម។ មន្ទីរសុខាភិបាល ធ្វើការត្រួតពិនិត្យនៅតាមគោលដៅ កន្លែងប្រចាំការ និងក្រុមការងារសម្រាប់សង្រ្គោះបន្ទាន់ និងអង្គភាព។ រដ្ឋាករទឹក ពិនិត្យការរៀបចំខ្សែបណ្តាញផ្គត់ផ្គត់ទឹកស្អាតនៅគ្រប់គោលដៅមានបន្ទប់ទឹក និងទឹកស្រោចស្រព។លោកក៏បានណែនាំដល់អាជ្ញាធរក្រុងសៀមរាប ត្រូវផ្សព្វផ្សាយជូនដំណឹងដល់ប្រជាពលរដ្ឋ ម្ចាស់សណ្ឋាគារ ផ្ទះសំណាក់ និង ភោជនីយដ្ឋាន ដែលស្ថិតនៅតាមបណ្តាដងវិថី ដែលត្រូវបានហាមឃាត់ធ្វើចរាចរណ៍ឆ្លងកាត់ នៅក្នុងព្រឹត្តិការណ៍អង្គរសង្ក្រាន្ត ដើម្បីទទួលបានប័ណ្ណសម្គាល់ចេញចូល។ ក្នុងនោះក៏សូមឱ្យក្រុមការងារទាំងអស់ ត្រូវមានស្មារតីទទួលខុសត្រូវខ្ពស់ ដើមី្បលើកកិត្តិយសខេត្ត ដោយត្រូវអនុវត្តទៅតាមតួនាទីជំនាញរបស់ខ្លួនដែលបានកំណត់ឱ្យសម្រេចបានជោគជ័យ ព្រោះព្រឹត្តិការណ៍អង្គរសង្ក្រាន្តឆ្នាំ២០២៥ ត្រូវបានចងក្រងជាប្រវត្តិសាស្ត្រ ដើមី្បឆ្ពោះទៅការចុះបញ្ជីជាសម្បត្តិបេតិកភណ្ឌពិភពលោកថែមទៀតផង៕KD

អត្ថបទ និងរូបភាព៖ លោក មុី សុខារិទ្ធ

កែសម្រួល៖ លោក អ៊ុន ណារាជ្យ