ខេត្តសៀមរាប ៖ គិតមកត្រឹមថ្ងៃទី០២ ខែមេសា ឆ្នាំ២០២៥នេះ អាជ្ញាធរខេត្តសៀមរាប រួមនឹងក្រុមការងារពាក់ព័ន្ធ កំពុងមមាញឹកក្នុងការរៀបចំទីតាំងប្រារព្ធព្រឹត្តិការណ៍អង្គរសង្ក្រាន្តក នៅទីតាំងសួរច្បាប់ព្រះរាជដំណាក់ និងដងស្ទឹងសៀមរាប ដែលជាទីតាំងត្រៀមរៀបចំកម្មវិធីកម្សាន្តជាច្រើន ក្រៅពីទីតាំងមុខប្រាសាទអង្គរវត្ត។
បើតាម លោក សេង វិចិត្រ ប្រធានកម្មវិធីផ្សារទឹក នៅតាមដងស្ទឹងសៀមរាប បានឱ្យដឹងថា កម្មវិធីផ្សារទឹកស្ទឹងសៀមរាប ជាកម្មវិធីមួយក្នុងចំណោមកម្មវិធីជាច្រើនទៀតរបស់ព្រឹត្ដិការណ៍អង្គរសង្ក្រាន្ត ដែលគិតមកទល់ពេលនេះរៀបចំឡើងបាន ៨០ភាគរយហើយ ចាប់ពីស្ពានព្រះរាជដំណាក់ ដល់ស្ពានវត្ដរាជបូណ៌។ ផ្សារទឹក មានកម្មវិធីកម្សាន្ដចំនួន៤ រួមមានផ្សារលើទឹកដោយលក់តាមទូក ជិះទូកលេងកំសាន្ដ ការប្រគុំតន្ដ្រីសម័យបុរាណ រៀបចំស្ដង់ពិព័រណ៌នៅសងខាងតាមដងផ្លូវស្ទឹងសៀមរាប។
លោក សេង វិចិត្រ បានឱ្យដឹងទៀតថា ការជិះទូលេងកំសាន្ដដោយមានទូកបងប្រូនប្រជានេសាទមកពីសហគមន៍ចុងឃ្នៀស ជាង១២០ទូក និងទូកហង្ស ៨ទូកមកពីទន្លេអុំ ហើយចំណូលដែលបានមកពីការលក់សំបុត្រគឺនឹងប្រគល់ជូនពួកគាត់ដែរ។ ក្នុងន័យនេះ សូមអំពាវនាវដល់អ្នកទេសចរជាតិ អន្ដរជាតិមកកំសាន្ដសប្បាយនៅព្រឹត្ដិការណ៍អង្គរសង្ក្រាន្ដឆ្នាំ២០២៥ ឱ្យបានច្រើនកុះករ ដើម្បីផ្ដល់ចំណូលសេដ្ឋកិច្ចដល់ប្រជាពលរដ្ឋនៅមូលដ្ឋាន៕KD
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
