រដ្ឋមន្ត្រីក្រសួងព័ត៌មាន ទទូចឱ្យចូលរួមកម្ចាត់ព័ត៌មានក្លែងក្លាយ ក្នុងសម័យបច្ចេកវិទ្យាទំនើប

រាជធានីភ្នំពេញ ៖ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន បានទទូចដល់បងប្អូនអ្នកសារព័ត៌មាន និងសាធារណៈសូមចូលរួមកម្ចាត់ព័ត៌មានក្លែងក្លាយ នៅក្នុងប្រព័ន្ធឌីជីថល នាសម័យដែលមានបច្ចេកវិទ្យាទំនើប។ មានប្រសាសន៍បែបនេះ ក្នុងពេលដែល ឯកឧត្តមរដ្ឋមន្ត្រី អញ្ជើញជាអធិបតី ក្នុងសន្និសីទសារព័ត៌មាន ដើម្បីផ្សព្វផ្សាយអំពីការអនុវត្តយុទ្ធនាការ «និយាយថាទេចំពោះព័ត៌មានក្លែងក្លាយ» ដែលរៀបចំឡើង ដោយក្រសួងព័ត៌មាន នៅទីស្តីការក្រសួង នារសៀលថ្ងៃទី៣១ ខែមីនា ឆ្នាំ២០២៥នេះ។
ឯកឧត្តមរដ្ឋមន្រ្តីក្រសួងព័ត៌មាន បានមានប្រសាសន៍សង្កត់ធ្ងន់ថា ព័ត៌មានក្លែងក្លាយបែកចែកជាបីប្រភេទសំខាន់ៗ គឺព័ត៌មានក្លែងបន្លំ បំភ្លៃ និងភ័ន្តច្រលំ ហើយនៅក្នុងចំណោមព័ត៌មានក្លែងក្លាយទាំងបីនេះ គឺព័ត៌មានក្លែងបន្លំ និងបំភ្លៃ បង្កើតឡើងដោយចេនាអាក្រក់។
ឯកឧត្តម នេត្រ ភក្រ្តា រដ្ឋមន្រ្តីក្រសួងព័ត៌មាន បានទទូចដល់អ្នកសារព័ត៌មាន និងសាធារណៈជនចូលរួមទប់ស្កាត់ព័ត៌មានក្លែងក្លាយទាំងនោះ តាមរយៈការផ្សព្វព័ត៌មានពិត និងកុំចែកចាយព័ត៌មានក្លែងក្លាយ តាមប្រព័ន្ធឌីជីថល។
សូមជម្រាបជូនថា យោងតាមរបាយការណ៍ របស់ក្រសួងព័ត៌មាន កាលពីឆ្នាំ២០២៤កន្លងទៅ ក្រសួងបានរកឃើញការផ្សព្វផ្សាយព័ត៌មានក្លែងក្លាយមានចំនួនរហូតទៅដល់ជាង៣ពាន់ព័ត៌មាន ដែលចំនួននេះគឺមានការកើនឡើងប្រមាណ១៤ភាគរយ ប្រៀបធៀបទៅនឹងឆ្នាំ២០២៣៕KD