ខេត្តកំពង់ស្ពឺ ៖ យោងតាមសេចក្តីរាយការណ៍ចុងក្រោយដែល ទីភ្នាក់ងារសារព័ត៌មានគូលែនដេលី ទទួលបាននៅព្រលប់ថ្ងៃទី ២១ ខែមិនា ឆ្នាំ២០២៥ នេះ បានឲ្យដឹងថា មានរបាយការណ៍របស់ស្នងការដ្ឋាននគរបាលខេត្តកំពង់ស្ពឺ មកថា អ្នកបើកបរឡានធំ ដែលកិនអ្នកជិះម៉ូតូ៣នាក់ស្លាប់ នៅស្រុកភ្នំស្រួច ត្រូវតំណាងអយ្យការឲ្យទៅវិញ ព្រោះកំហុសខាងម៉ូតូ តែបានពិន័យរឿងអត់ប័ណ្ណបើកបរ តែត្រូវបានពិន័យរឿងអត់ប័ណ្ណបើកបរ តែប៉ុណ្ណោះ។
សេចក្តីក្ដីរាយការណ៍ដដែលបានបន្តថា កាលពីថ្ងៃទី២០ ខែមីនា ឆ្នាំ២០២៥ វេលាម៉ោង១៥ និង៤៥នាទី នៅលើផ្លូវជាតិលេខ៤ ចន្លោះគីឡូម៉ែត្រ៦៥-៦៦ ត្រង់ចំណុចភូមិក្រាំងខ្ជាយ ឃុំតាំងស្យា ស្រុកភ្នំស្រួច មានម៉ូតូ០១គ្រឿង ម៉ាកហុងដា ឌ្រីម C125 ពណ៌ខ្មៅ ពាក់ផ្លាកលេខភ្នំពេញ1GY-9242 បើកបរដោយឈ្មោះ ម៉ុត រ៉ាក់ ភេទប្រុស អាយុ១៧ឆ្នាំ រស់នៅភូមិព្រៃខ្លា ឃុំព្រៃខ្លា ស្រុកកោះអណ្តើក ខេត្តតាកែវ ឌុបមនុស្សចំនួន២នាក់មានឈ្មោះ អាត សំអូន ភេទប្រុស អាយុ១៧ឆ្នាំ រស់នៅភូមិកំពង់ប្រហុក ឃុំកោះជីរាំង ស្រុឯកភ្នំ ខេត្តបាត់ដំបង និងឈ្មោះ សាម ផានិ ភេទប្រុស អាយុ១៦ឆ្នាំ រស់នៅភូមិសំរោង ឃុំពោអ៍ ស្រុកកំពង់ឆ្នាំង កំពង់ឆ្នាំង (មានពាក់មួកសុវត្ថិភាព) បើកបរពីទិសខាងលិចទៅទិសខាងកើត ដល់ចំណុចខាងលើបានបុករថយន្ត០១គ្រឿងទៀត ម៉ាកហ៉ីយ៉ាន់ដាយ ពណ៌ស ពាក់ផ្លាកលេខភ្នំពេញ3I-3885 បើកបរដោយឈ្មោះ ឡាំ ភាង ភេទប្រុស អាយុ៤៦ឆ្នាំ រស់នៅភូមិក្រែក ឃុំក្រែក ស្រុកពញ្ញាក្រែក ខេត្តត្បូងឃ្មុំ ដែលកំពុងបើកបរបញ្ច្រាសទិសគ្នា បណ្តាលឲ្យមានគ្រោះថ្នាក់ដល់មនុស្ស និងខូចខាតសម្ភារដូចខាងក្រោម៖ ស្លាប់មនុស្សចំនួន៣នាក នៅកន្លែងកើតហេតុ ខូចខាតរថយន្ត១គ្រឿងស្រាល ម៉ូតូ០១គ្រឿងធ្ងន់ ចំពោះវត្ថុតាងរថយន្ត និងម៉ូតូ យកមករក្សាទុកនៅអធិការដ្ឋាននគរបាលស្រុកភ្នំស្រួច ដើម្បីចាត់ការតាមនីតិវិធី។ 
សេចក្តីរាយការណ៍បញ្ជាក់ថា ក្រោយកើតហេតុសមត្ថកិច្ចបាននាំអ្នកបើកបររថយន្តឈ្មោះ ឡាំ ភាង មកសាកសួរនៅអធិការដ្ឋាននគរបាលស្រុកភ្នំស្រួច។
តាមការសន្និដ្ឋានរបស់សមត្ថកិច្ចជំនាញ៖ អ្នកបើកម៉ូតូ បើកបរមិនប្រកាន់ស្តាំ ត្រង់ចំណុចមានគំនូសជាប់បង្ហូតកណ្តាលទ្រូងផ្លូវ (ហាមបើកបរជែង ឬឆ្លងកាត់) បានបើកបញ្ច្រាសទិសចរាចរណ៍ក្នងចំណែកផ្លូវម្ខាងទៀត ទៅបុករថយន្ត ០១ គ្រឿង ដែលកំពុងបើកបរបញ្ច្រាសទិសគ្នា បង្កឡើងនូវគ្រោះថ្នាក់ បណ្តាលឱ្យស្លាប់ ខ្លួនឯង និងអ្នកដទៃ គឺខុសច្បាប់ស្តីពីចរាចរណ៍ផ្លូវគោក ចំណែកអ្នកបើកបររថយន្តម៉ាក ហ៊ីយិនដាយ គ្មានបណ្ណបើកបរ គឺខុសច្បាប់ស្តីពីចរាចរណ៍ផ្លូវគោកផងដែរ៕KD
អត្ថបទ និងរូបភាព លោក កណ្ដុរតូច