ខេត្តសៀមរាប ៖ នៅព្រឹកថ្ងៃទី០៣ ខែមិនា ឆ្នាំ២០២៥ និងនាពេលកន្លងមក មហាជនបានធ្វើរិះគន់យ៉ាងខ្លាំង ទៅលើរូបភាពប៉ុន្មានសន្លឹករបស់នគរបាលពីររូប ដែលមានតួនាទីជាលោកនាយរងការិយាល័យគ្រប់គ្រងជនបរទេស នៃស្នងការដ្ឋាននគរបាលខេត្តសៀមរាប បន្ទាប់ពីលោកនារងមួយរូបបានដឹកនាំសហជីវិន ពាក់ឯកសណ្ឋាន(ស័ក្តិ) ចូលបរិភោគអាហារ នៅក្នុងអាហារដ្ឋានសាធារណៈ មួយកន្លែងទល់មុខ អតិតអាកាសយានដ្ឋានអន្តរជាតិសៀមរាប ឲ្យល្មើសនឹងប្រការ ១៨ ចំណុច៣ នៃ បទវិន័យនគរបាលជាតិកម្ពុជា ប្រកាសលេខ ៨៧៣ ប្រក និងលោកនាយរងមួយរូបទៀតបានគ្រោងឯកសណ្ឋានមិនមានកាតសំគាល់ខ្លួនជាមន្ត្រីធ្វើការងារផ្ទាល់ជាមួយភ្ញៀវបរទេស នៅ Police Box ក្បែរ Pub Street ដែលកន្លងមក លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប ធ្លាប់បានណែនាំឲ្យនគរបាលនៅទូទាំងខេត្តសៀមរាប ត្រូវពាក់កាតនគរបាលជានិច្ចនៅពេលបំពេញកិច្ចការងារ។
មហាជនសួរថា តើលោកនាយរងការិយាល័យគ្រប់គ្រងជនបរទេសពីររូបខាងលើ នឹងអាចទទួលរងនូវវិន័យកងកម្លាំងដែរឬទេ?
មហាជនបញ្ជាក់ថា លោកនាយរងការិយាល័យគ្រប់គ្រងជនបរទេស ដែលរងការរិះគន់ខាងលើ ទី១ មានឈ្មោះ ឃុត ប៉ូលីន អត្តលេខ ៤៥០៦៦ ឋានន្តរស័ក្តិ វរសេនីយ៍ទោ 
និង លោកនាយរងការិយាល័យទី២ មានឈ្មោះ ហ៊ីម សំណាង អត្តលេខ ៧៣៦៩៩ ឋានន្តរស័ក្តិ វរសេនីយ៍ទោ។
ជុំវិញការរិះគន់នេះដែរ លោកវរសេនីយ៍ឯក ថូ ស៊ីណា នាយការិយាល័យគ្រប់គ្រងជនបរទេស នៃស្នងការដ្ឋាននគរបាលខេត្តសៀមរាប បានបញ្ជាក់ថា « លោកនឹងណែនាំបន្ថែម!…ជាទូទៅកងកម្លាំងនៅពេលដែលចូលហូបអី ត្រូវដោះ Uniform (ឯកសណ្ឋាន) ហើយរឿងកាតសំគាល់របស់ Police (នគរបាល) គឺទៅតាមតំបន់… ដោយឡែកនៅខេត្តសៀមរាប លោកស្នងការបានណែនាំឲ្យពាក់គ្រប់គ្នា ប៉ុន្តែពីមុនអត់មានពាក់ទេ..នេះអាចថាគាត់ប្រញាប់ពេកទើបភ្លេចពាក់»។
ចំពោះរឿងរាវខាងលើនេះផងដែរ លោកឧត្តមសេនីយ៍ត្រី ណុប សារ៉ាក់ ស្នងការរងទទួលផែនការងារសេនាធិការ និងជាអ្នកនាំពាក្យ នៃស្នងការដ្ឋាននគរបាលខេត្តសៀមរាប បានមានប្រសាសន៍ឲ្យដឹងថា «គាត់ដូចជាមិនមានកំហុសឆ្គងអីណាធ្ងន់ធ្ងរនោះទេ..គ្រាន់តែថាមានចំណុចខ្វះខាតបន្តិចបន្តួចយើងអប់រំណែនាំគាត់តែប៉ុណ្ណឹងឯង»។
លោកឧត្តមសេនីយ៍ត្រី ណុប សារ៉ាក់ បន្តថា លោកនៅផែនសេនាធិការទេ មិនមែននៅខាងអនុវត្តវិន័យនោះទេ ដូច្នេះលោកមិនដឹងអំពីបញ្ហានេះទេ។
លោកឧត្តមសេនីយ៍ត្រី ណុប សារ៉ាក់ បញ្ជាក់ថា « លោកនាយរងការិយាល័យទាំង២រូប មិនបានខុសវិន័យអីធ្ងន់ធ្ងរនោះទេ ដោយមើលទៅលើឯកសណ្ឋានហ្នឹង មិនមែននៅកន្លែងសេពគ្រឿងស្រវឹង ឬកន្លែងសប្បាយណាមួយទេ អាចជាកន្លែងបរិភោគពេលព្រឹកក្នុងអំឡុងពេលមានបេសកកម្ម តែប៉ុណ្ណោះ..នឹងចាំជូនដំណឹងទៅផែនធនធានមនុស្ស ដើម្បីឲ្យប្រធានផែនរបស់ពួកគាត់ធ្វើការអប់រំណែនាំ»។
ទីភ្នាក់ងារសារព័ត៌មានគូលែនដេលី នៅមិនទាន់មានការស្នើសុំបំភ្លឺទៅកាន់លោកឧត្តមសេនីយ៍ត្រី អៀង មករា ស្នងការងទទួលផែនការងារធនធានមនុស្សជុំវិញរឿងនេះនៅឡើយទេ៕KD