ខេត្តសៀមរាប ៖ នៅព្រលប់ថ្ងៃទី ២៤ ខែកុម្ភៈ ឆ្នាំ២០២៥នេះ លោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប បានបញ្ជាក់ថា «ការករណីយប់មិញ ស្រវឹងទាំង២នាក់ នគរបាលពិន័យ ២លានរៀល និងអនុវត្ដច្បាប់វិន័យនគរបាលជាតិ ចំណែកឯប្រជាពលរដ្ឋ ១លានរៀល។ ពេលស្រវឹងកុំបើកបរ!! »។ 
នេះបើយោងតាមការបង្ហោះ នៅលើហ្វេសប៊ុកដែលមានឈ្មោះថា «HS Thy» ដែលគេស្គាល់ថា ជារបស់ លោកស្នងការខេត្ត បន្ទាប់កើតមានករណីបុរស ០២នាក់ ជានគរបាល ដែល បំរើការក្នុងស្នងការដ្ឋាននគរបាលខេត្តសៀមរាប រងការចោទប្រកាន់ថា បានបង្កហិង្សាវាយតប់ប្រជាពលរដ្ឋ ឲ្យបែកឈាម ក្នុងករណីចរាចរណ៍បន្តិចបន្តួច នៅលើផ្លូវជាតិលេខ៦ ត្រង់ចំណុចស្តុបឈ្នះឈ្នះ(សាលាគ្រួស) ស្ថិតក្នុងភូមិគ្រួស សង្កាត់ស្វាយដង្គំ ក្រុងសៀមរាប ខេត្តសៀមរាប កាលពីវេលាម៉ោង២៣ និង ៤៥នាទីថ្ងៃទី២៣ ខែកុម្ភៈ ឆ្នាំ២០២៥កន្លទៅ។
យោងតាមលិខិតបំភ្លឺព័ត៌មាន របស់អ្នកនាំពាក្យស្នងការដ្ឋាននគរបាលខេត្តសៀមរាប នៅថ្ងៃទី ២៤ ខែកុម្ភៈ ឆ្នាំ២០២៥នេះ បានឲ្យដឹងថាករណីហិង្សាស្រាលមួយ បានកើតឡើងរវាងប្រជាពលរដ្ឋ និងនគរបាលខេត្តសៀមរាប នៅចំណុចស្តុបសាលាគ្រួស ស្ថិតនៅភូមិគ្រូស សង្កាត់ស្វាយដង្គំ ក្រុងសៀមរាប ខេត្តសៀមរាបនោះគឺ
១-ឈ្មោះ សែ សុខ ភេទប្រុស អាយុ ២៤ឆ្នាំ និងឈ្មោះ នាង សុឡេង ភេទប្រុស អាយុ ២៩ឆ្នាំ (ជនស៊ីវិល) បានឆ្លើយថា៖ វេលាម៉ោង២៣:០០នាទី ពួកខ្លួនបានចេញពីហាងសែនសប្បាយ៧(ក្រោយ ស្អាត)ក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប ហើយបើកបរម៉ូតូក្នុងស្ថានភាពស្រវឹង ត្រឡប់ទៅកន្លែងធ្វើការនៅដំណាក់ស្ប៉ា នៅផ្លូវក្រវ៉ាត់ក្រុង ស្ថិតនៅភូមិគ្រួស សង្កាត់ស្វាយដង្គំ បើកដល់ ចំណុចមុខសណ្ឋាគារស៊ីធីអង្គរ (ខាងកើតស្តុបគ្រួស) រូបខ្លួន (ឈ្មោះ នាង សុឡេង) បានស៊ីញ៉ូបត់ឆ្វេង បម្រុងឆ្លងថ្នល់ ស្រាប់តែមានរថយន្ត ០១គ្រឿង ម៉ាក PRIUS ជាន់ហ្វាំងយ៉ាងខ្លាំងពីក្រោយ ខ្លួនក៏បើក ទៅមុខដល់ស្តុបសាលាគ្រួសក៏ឈប់ម៉ូតូហើយត្រូវបានភាគីអ្នកបើករថយន្តស្តីបន្ទោស ហើយនៅពេលភា គីអ្នកបើករថយន្ត (ឈ្មោះ ហាក់ ចន្ទដារា) បើកទ្វារបម្រុងចុះពីលើរថយន្តឈ្មោះ សែ សុខ បានស្ទុះទៅ រុញទ្វារថយន្តមិនឱ្យចុះបាន ភ្លាមនោះអ្នកអមដំណើរម្នាក់ (ឈ្មោះ ប៊ុត សម្បត្តិ) បានចុះពីរថយន្តផ្នែកខាង ស្តាំ ហើយវាយទៅលើឈ្មោះ នាង សុឡេង ចំមាត់ចំនួន ០១ដៃ បណ្តាលឱ្យរងរបួសស្រាល ភ្លាមនោះរូប ខ្លួនក៏ប្រើហិង្សាទៅលើឈ្មោះ ប៊ុត សម្បត្តិ ជានគរបាលវិញប្រហែល ០២ ទៅ ០៣ដៃ។
២-ចំណែកឈ្មោះ ប៊ុត សម្បត្តិ ភេទប្រុស អាយុ ៤៣ឆ្នាំ, ឈ្មោះ ហាក់ ចន្ទដារា ភេទប្រុស អាយុ ៥០ឆ្នាំ (ជានគរបាលជាតិ)មុនពេលកើតហេតុរូបខ្លួនទាំងពីរបើករថយន្តចេញពីមុខវត្តកេសរារាម ស្ថិតភូមិ តាភុល សង្កាត់ស្វាយដង្គំ បើកបរពីកើត ទៅលិច ក្នុងគោលបំណងទៅដេកប្រចាំការនៅស្នងការដ្ឋាន នគរបាលខេត្តសៀមរាប ដល់មុខសណ្ឋាគារស៊ីធីអង្គរ (ខាងកើតស្តុបគ្រួស) ម៉ូតូខាងលើបានស៊ីញ៉ូហើយ បំរ៉ុងបត់ឆ្លងថ្នល់កាត់ពីមុខឡានខ្លួន ហើយខ្លួនបានជាន់ហ្វាំងយ៉ាងខ្លាំងព្រោះខ្លាចបុកប៉ះទៅលើភាគី ខាងម៉ូតូ ភ្លាមនោះអ្នកបើកម៉ូតូបានបើកទៅមុខដល់ស្តុបសាលាគ្រួស ហើយពួកខ្លួនក៏បានណែនាំទៅភាគី ម៉ូតូថា បើកបរឱ្យមានការប្រុងប្រយ័ត្ន គោរពសិទ្ធិអាទិភាព ពេលនោះក៏ក្លាយជាទំនាស់ពាក្យសម្តីមាន អំពើហិង្សាទៅវិញទៅមកដូចបានរៀបរាប់ខាងលើ។
លិខិតដដែលបញ្ជាក់ថា នៅក្នុងហេតុការនោះមានកម្លាំងនគរបាលកងអន្តរាគមន៍ នៃស្នងការដ្ឋាននគរបាលខេត្តសៀមរាបចុះទៅដល់កន្លែងកើតហេតុធ្វើការសម្របសម្រួល តែភាគីទាំងពីរពុំស្តាប់ក៏បាននាំយកទៅប្រគល់ជូនមន្ត្រីជំនាញព្រហ្មទណ្ឌ និងមន្ត្រីជំនាញចរាចរណ៍ផ្លូវគោកសហការបន្តនីតិវិធីដើម្បីពិនិត្យរកជាតិ អាកុលលើភាគីទំនាស់ដោយរកឃើញជាលទ្ធផលដូចខាងក្រោម៖
-ភាគីអ្នកជិះប៉ូតូ (ប្រជាពលរដ្ឋ)
១-ឈ្មោះ សែ សុខ ភេទប្រុស អាយុ ២៤ឆ្នាំ – ០០,០ ក្នុង ១លីត្រខ្យល់(អ្នកបើកបរម៉ូតូ)
២-ឈ្មោះ នាង សុឡេង ភេទប្រុស អាយុ ២៩ឆ្នាំ – ១,០៤ ក្នុង ១លីត្រខ្យល់
-ភាគីអ្នកជិះរថយន្ត (នគរបាល)
១-ឈ្មោះ ប៊ុត សម្បត្តិ ភេទប្រុស អាយុ ៤៣ឆ្នាំ – ០,៤៤ ក្នុង ១លីត្រខ្យល់
២-ឈ្មោះ ហាក់ ចន្ទដារា ភេទប្រុស អាយុ ៥០ឆ្នាំ – ០,៤០ ក្នុង ១លីត្រខ្យល់
អ្នកនាំពាក្យ និងក្រុមប្រតិកម្មរហ័ស នៃស្នងការដ្ឋាននគរបាលខេត្តសៀមរាប បានបញ្ជាក់បន្ថែមជូនផងដែរថា ករណីហិង្សាស្រាលដែលបានកើតឡើងនេះព្រោះតែភាពទាំងពីរនេះ បើកបរមានជាតិអាកុលក្នុងខ្លួន និង មិនគោរពសិទ្ធិអាទិភាព។ ប៉ុន្តែទោះយ៉ាងណា នៅព្រឹកថ្ងៃទី២៤ ខែកុម្ភៈ ឆ្នាំ២០២៥ ករណីខាងលើនេះគូ ភាគីទាំងពីរបានទទួលស្គាល់កំហុសរៀងៗខ្លួន និងបានសម្របសម្រួលគ្នាបញ្ចប់ទំនាស់រួចរាល់។
ចំពោះមន្ត្រីនគរបាលជាតិនិងប្រជាពលរដ្ឋដែលមន្ត្រីជំនាញចរាចរណ៍ផ្លូវគោកបានវាស់ជាតិ អាកុលរកឃើញអំពីលទ្ធផលខាងលើ គឺលោកស្នងការ នៃស្នងការដ្ឋាននគរបាលខេត្តសៀមរាប នឹងអនុ វត្តតាមច្បាប់ចរាចរណ៍ផ្លូវគោក ជាពិសេសអនុវត្តតាមអនុក្រឹត្យលេខ៣៩ ត្រង់មាត្រា១០ លើអ្នកបើកបរ រថយន្ត និងមាត្រា៦ លើអ្នកបើកបរម៉ូតូ។ លើសពីនេះ មន្ត្រីនគរបាលជាតិទាំងពីររូបខាងលើ តាមបទ បញ្ជារបស់លោកស្នងការ បានចាត់ក្រុមប្រឹក្សាវិន័យឱ្យពិនិត្យ និងចាត់ចែងតាមបទវិន័យនគរបាលជាតិហើយ៕KD