ខេត្តកណ្តាល ៖ យោងតាមសេចក្តីបំភ្លឺព័ត៌មានរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តកណ្តាល បានឱ្យបានថា ពាក់ព័ន្ធករណីចុះផ្សព្វផ្សាយវីដេអូ សកម្មភាពវៃតប់គ្នា នៅក្នុងបរិវេណសាលាវិទ្យាល័យ ហ៊ុន សែន សេរីភាព អមដោយខ្លឹមសារថា៖ បែកធ្លាយវីដេអូចេញពី វិទ្យាល័យ ហ៊ុន សែន សេរីភាព ក្រុងតាខ្មៅ នៅវេលាម៉ោង ៩ និង ៣០នាទីព្រឹក ត្រូវនឹងថ្ងៃទី១៤ ខែកុម្ភៈ ឆ្នាំ២០២៥ មានការប្រើអំពើហិង្សាមួយនៅក្នុង វិទ្យាល័យ ហ៊ុន សែន សេរីភាព ទៅលើសិស្សសាលាដោយអ្នកដែលប្រើប្រាស់អំពើហិង្សានោះគេបានឱ្យដឹងថាមានរហ័សនាមសន្តិសុខជើងខ្វេវ។
ស្នងការដ្ឋាននគរបាលខេត្តកណ្តាលបន្តថា ក្រោយពីទទួលបានព័ត៌មាននេះភ្លាម ដោយអនុវត្តតាមបទបញ្ជាលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្ត នៅថ្ងៃទី១៩ ខែកុម្ភៈ ឆ្នាំ២០២៥ លោកអធិការនគរបាលក្រុមតាខ្មៅ បានបញ្ជាកម្លាំងជំនាញ ស្រាវជ្រាវទទួលបានលទ្ធផល ស្នងការដ្ឋាននគរបាលខេត្ត រកឃើញថាជាករណី ហិង្សាដោយចេតនាដែលកើតហេតុកាលពី ថ្ងៃទី១៤ ខែកុម្ភៈ ឆ្នាំ២០២៥ វេលាម៉ោង ០៨ និង ៣០នាទីព្រឹក នៅចំណុចក្នុងសាលាវិទ្យាល័យ ហ៊ុន សែន សេរីភាព ភូមិតាខ្មៅ២ សង្កាត់តាខ្មៅ ក្រុងតាខ្មៅ ខេត្តកណ្តាល។ 
ស្នងការដ្ឋានបានបន្ថែមថា ជនរងគ្រោះនៅក្នុងករណីនេះមាន ០១នាក់ មានឈ្មោះ ពាន សុវ៉ាន់ដារ៉ា ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្ស ទីលំនៅបច្ចុប្បន្ន ភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល ហើយចំណែកឯជនសង្ស័យមាន ០១នាក់ ឈ្មោះ ឡុង សម្ផស្ស ភេទប្រុស អាយុ៤២ឆ្នាំ ជនជាតិខ្មែរ មុខរបរ សន្តិសុខសាលា ទីលំនៅបច្ចុប្បន្ន ភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល។
សេចក្តីបំភ្លឺព័ត៌មាន របស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តកណ្តាល បានបញ្ជាក់ថា សភាពរឿងហេតុនោះគឺ កាលពីថ្ងៃទី១៤ ខែកុម្ភៈ ឆ្នាំ២០២៥ វេលាម៉ោង ០៨ និង ៣០នាទីព្រឹក ឈ្មោះ ឡុង សម្ផស្ស ភេទប្រុស អាយុ៤២ឆ្នាំ ជនជាតិខ្មែរ ទីលំនៅភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ធ្វើជាសន្តិសុខសាលាវិទ្យាល័យ ហ៊ុន សែន សេរីភាព គាត់បានដើរមើលពិនិត្យសិស្សមិនគោរពវិន័យរបស់សាលាហើយក៏ឃើញសិស្សឈ្មោះ ពាន សុវ៉ាន់ដារ៉ា ភេទប្រុស អាយុ១៨ឆ្នាំ ជាសិស្សថ្នាក់ទី១១”L” នៃសាលវិទ្យាល័យ ហ៊ុន សែន សេរីភាព គាត់មិនបានគោរពវិន័យសាលា សក់គាត់វែង សាលាតម្រូវឱ្យសិស្សពាក់ស្បែកជើង ប៉ាត់តាពណ៌ស ប៉ុន្តែគាត់ពាក់ស្បែកជើងផ្ទាត់ ពេលនោះសន្តិសុខឈ្មោះ ឡុង សម្ផស្ស ក៏បានហៅសិស្សឈ្មោះ ពាន សុវ៉ាន់ដារ៉ា ឱ្យចុះមកធ្វើពលកម្ម តែមិនទាន់បានធ្វើពលកម្មផង ក៏បានទាស់ពាក្យសម្តីគ្នា ដោយសន្តិសុខបាននិយាយថា៖ កូនឯងខុសវិន័យ២ដងមកហើយ កុំឱ្យប៉ារបស់កូនមកសាលាទៀត វិន័យសាលារៀន ឱ្យកាត់សក់ខ្លី ពាក់ស្បែកជើងប៉ាត់តា ពណ៌ស ហើយកូនសិស្សក៏បានតបថា៖ មិចក៏យកឈ្មោះប៉ារបស់គេ មកនិយាយ ហើយក៏ស្ទុះមកក្របួចកអាវរបស់សន្តិសុខ ពេលនោះសន្តិសុខក៏ក្រវាសដៃចេញ បន្ទាប់មកកូនសិស្សបានវាយសន្តិសុខចំនួនពីរដៃចំឆ្អឹងជំនីខាងឆ្វេង ហើយសន្តិសុខក៏បានតដៃទៅវិញចំនួនពីរដៃវិញ រួចក៏មានសិស្សចូលមកបំបែកឃាត់ចេញកុំឱ្យវាយគ្នាទៀត។
ចំពោះករណីនេះកើតហេតុកាលពីថ្ងៃទី១៤ ខែកុម្ភៈ ឆ្នាំ២០២៥ វេលាម៉ោង ០៨ និង ៣០នាទីព្រឹក នៅចំណុចក្នុងបរិវេណសាលាវិទ្យាល័យ ហ៊ុន សែន សេរីភាព ក្រោយពីកើតហេតុភ្លាម លោកនាយកសាលា បានហៅឪពុកម្តាយខាងសិស្សឈ្មោះ ពាន សុវ៉ាន់ដារ៉ា និងសន្តិសុខឈ្មោះ ឡុង សម្ផស្ស មកទីចាត់ការ ធ្វើការដោះស្រាយបញ្ចប់រឿង និងអប់រំណែនាំ និងធ្វើកិច្ចសន្យារៀងៗខ្លួន ឈប់ឱ្យមានបញ្ហានេះតទៅទៀត។
ស្នងការដ្ឋាននគរបាលខេត្តកណ្តាល ក៍ស្នើសុំឲ្យសាធារណជន និងបណ្ដាញសារព័ត៌មានជ្រាបតាមការគួរ៕KD