ខេត្តកំពត ៖ ព្រះភិរម្យភាសា អ៊ុក អ៊ូ ដែលអ្នកស្រុកហៅ ភិរម្យ ង៉ុយ ឬក្រមង៉ុយ ជាអ្នកប្រាជ្ញអក្សរសាស្ត្រខ្មែរ បានបង្កើតច្បាប់ប្រៀនប្រដៅ ដាស់តឿន ដល់កូនខ្មែរ គ្រប់ៗរូបឲ្យចងចាំនឹងអនុវត្តតាមជារៀងរហូតមក ដោយគេតែងតែនៅចងចាំពាក្យមួយឃ្លាថា « ធ្វើស្រែឲ្យមើលស្មៅ ទុកដាក់កូនចៅឲ្យមើលផៅសន្ដាន » តួយ៉ាងដូចជានារីម្នាក់មានឈ្មោះ អ ទ ភេទស្រី អាយុ៤៩ឆ្នាំ ជនជាតិខ្មែរ បានសេពគប់បុរសម្នាក់ដោយមិនដឹងប្រវត្តិច្បាស់លាស់ ក៍បណ្ដែតបណ្ដោយខ្លួនឲ្យជ្រុលជ្រួសហួសគន្លងប្រពៃណី ទើបដឹងថាបុរសជាសង្សារនោះមានប្រពន្ធពេញច្បាប់រួចបានទៅហើយ និងបានបង្កជាហិង្សារហូតដល់បុរសសង្សារហ៊ានលើកដៃសម្លាប់នាងយ៉ាងអាណោចអាធ័ម នៅក្នុងភូមិតាព្រុំ ឃុំមានជ័យ ស្រុកឈូក ខេត្តកំពត កាលពីវេលាម៉ោង ១២ និង១០នាទី ថ្ងៃទី១១ ខែកុម្ភៈ ឆ្នាំ២០២៥កន្លងទៅ។
យោងតាមប្រភពបានឲ្យដឹងថា ក្រោយពីមានហេតុការណ៍ខាងលើកើតឡើង លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានដាក់បទបញ្ជាឲ្យ កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំសហការ ជាមួយស្នងការដ្ឋាននគរបាលខេត្តកំពត និងខេត្តតាកែវ បានធ្វើការស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណ និងទីតាំងលាក់ខ្លួនរបស់ជនសង្ស័យខាងលើ។
ប្រភពបន្តថា នៅថ្ងៃទី១៣ ខែកុម្ភៈ ឆ្នាំ២០២៥ វេលាម៉ោង១៤ និង៣០នាទី កម្លាំងជំនាញបានបន្តដឹកនាំសហការគ្នា ធ្វើការឃាត់ខ្លួនជនសង្ស័យម្នាក់មានឈ្មោះ ភុំ បុត្រ ភេទប្រុស អាយុ៤៥ឆ្នាំ ជនជាតិខ្មែរ ត្រង់ចំណុច ភូមិត្រពាំងខ្លូត ឃុំត្រាំកក់ ស្រុកត្រាំកក់ ខេត្តតាកែវ។
ប្រភពបន្ថែមថា ជនសង្ស័យខាងលើបានសារភាពថា កាលពីថ្ងៃកើតហេតុខ្លួនបានទៅដេកជាមួយជនរងគ្រោះ បន្ទាប់មកជនរងគ្រោះបានដឹងថា ខ្លួនមានប្រពន្ធ ទើបឈានដល់ការឈ្លោះប្រកែកគ្នា ហើយខ្លួនយកដំបងវាយទៅលើជនរងគ្រោះបណ្តាលស្លាប់ រួចខ្លួនប្រមូលយកទ្រព្យសម្បត្តិ របស់ជនរងគ្រោះ រួមមាន ទូរស័ព្ទដៃចំនួន២គ្រឿង ក្រវិលមាស ទម្ងន់១ជីចិញ្ចៀនមាសទម្ងន់២ជី ខ្សែដៃប្លាទីន១តម្លឹង និងខ្សែ ក ប្លាទីន ទម្ងន់៣ជី រួចរត់គេចខ្លួនតែម្ដង។
ប្រភពបញ្ជាក់ថា បច្ចុប្បន្ន ជនសង្ស័យខាងលើ ត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តកំពត ជាម្ចាស់ករណី ដើម្បីកសាងសំណុំរឿងតាមនីតិវិធីច្បាប់៕KD